Вожодыр (шудон)
«Вожодыр» — удмурт ӝӧквыл шудонъёсты лэсьтӥсь «Chukinder» огазеяськонлэн нырысетӥ кылдытэм шудонэз.
Историез Тупатыны
«Вожодыр» шудон малпамын но поттэмын удмурт ӝӧквыл шудонъёсты лэсьтӥсь «Chukinder» огазеяськонэн 2018-тӥ арын. Шудонлэн презентациез 30-тӥ коньывуонэ 2018-тӥ арын ортчиз. Сое ваньзылы тодмо калыккуспо Хэллоуин нуналэ ортчытыны малпамын вал, малы ке шуоно шудонын ваньмыз Вожодыре ортче. Вожодыр — со сьӧд кужымъёслэн ву улысь потон но шаянтон дырзы. Шудонын валтӥсь геройёс — со удмурт мифологиысь но выжыкылъёсысь сьӧд кужымъёс. Пӧлазы Палэсмурт, Вуныл, Обыда. Шудонын ӟеч персонажъёс но вань, соос пӧлын Пеллясь, Алангасар, Коркакузё.
Пуштросэз Тупатыны
Шудон Вожодыре огшоры удмурт гуртын ортче. «Уй» вуэ ке, урод но ӟеч персонажъёс сайкало но асьсэ ужъёсынызы вырыны кутско:
- Палэсмурт — уйин сайка но быръем муртсэ бичатыса шудонысь поттэ;
- Обыда — быръем шудӥсез ведна но вераськыны быгатонзэ тала;
- Вуныл — жильыртӥсь куараеныз йырез поромытэ, быръем шудӥсь муртэз, дораз Вуныл вуылэм бере, шудонысь поттыны уг луы, солэн алибиез кылдэ;
- Пеллясь — адямиез бурмытыны быгатэ, ассэ но;
- Алангасар — ваньзэ дӥсь пыр адӟе но уйин Палэсмуртэз уйылэ;
- Корка Кузё — уйин картаосты вошъя, персонажъёс шӧдтэк шорысь мукет геройёс луыса сайканы быгато;
- Гурт калык — удмурт гуртысь огшоры адямиос, соос гинэ уйин сайкатэк изё, нош нуназе сьӧд кужымъёсты кутыны выро.
Шудон пумын вормо яке ӟеч геройёс, яке сьӧд кужымъёс. Шудон удмурт кылэз волятэ но малпанъёсты вераны дышетэ. Йырвизез но кылэз туж умой ужатӥсь шудон. Шудонэн мукет кылъёсын но шудыны луэ.
«Вожодыр» турнир Тупатыны
«Вожодыр» турнир «Chukinder» огинлэн азьветлӥсеныз Вадим Крестьяниновен малпамын вал. Шудонэ люкаськем калык «Вожодыр» ӝӧквыл шудонэн шудэ. Турнире оглом 30 мурт пыриськиз. Шудонъёс 9-тӥ, 16-тӥ, 23-тӥ толсуре 2019-тӥ арын ортчизы. Полуфиналысь тужгес но золъёсыз 13-ез шудӥсьёс 13-тӥ толшоре 2020-тӥ арын финалэн бичаськизы. Нырысетӥ интые Эгра ёросысь Максим Агафонов потӥз, кыкетӥ интые — Эгра ёросысь Анастасия Сергеева, куинетӥ интые — Дэбес ёросысь Денис Максимов. Турнирез котькуд ар ортчытыны малпамын.