Мынам Удмуртие
«Мынам Удмуртие» (ӟуч Моя́ Удму́ртия) — Удмурт Республикаысь самой егитэз телерадиокомпания. Передачаоссэ возьматыны кутскиз 2002 аре 2 октябре. Телепрограммаосыз эфире потыло дециметровой диапазонын (аслаз программаосызлы нуналлы быдэ 3 час висъямын), радиопрограммаосыз — FM-диапазонын (аслаз программаосызлы — 18 час). ТРК «Удмуртия» — кун унитарной предприятие, солэн учредителез — Удмурт Республикаысь правительство.
Телепрограммаосыз пӧлысь тросэз пото удмурт кылын, ӵемысь — ӟуч титръесын. Тужгес но тодмо проект луэ реалити-шоу «По соседству мы живём» («Бускель луыса ми улӥськом»). Пиналъёслы нимаз передача вань — «Шудон корка»: нуисьёсыз – Малыок (Ольга Ардашева) но мунё Моко. Со программа «Тэффи» премиез басьтӥз (2006). «Моя Удмуртия»-лэн кизилиез — режиссёр Лев Вахитов, со — уно тунсыкоесь фильмъёслэн авторзы, «Солнечный зайчик» фильмез понна «Тэффи» премия басьтӥз (2005): отын вераськон мынӥз суредась но удмурт выжыкылъёсын книгаослы иллюстрациосты лэсьтӥсь Менсадык Гарипов сярысь. Трос проектъёс Светлана Кибординалэн. Тросэз учкизы солэсь программазэ «Витисько тонэ». Али Света нуэ котькуд кӧс нунал ӵукнаосы меӵак эфирын «Шундыберганъёс» программазэ.
Ӟуч кылын потӥсь авторской программаосыз пӧлысь уката тодмо луэ «Шурики» нимо проект (ужа 1996 арысен). Со потӥз нырысьсэ «Новый регион» нимо Ижысь телекомпанилэн эфираз, нош али улонзэ азьланьтэ «Моя Удмуртия»-ын. Та проектлэн жанрез пумысен кивалтӥсез Юрий Широбоков вера, со комикс луэ шуыса. Та проектлэн геройесыз пӧртэм серемес учыръесы шедё; ӵемгес уже кутӥсько пӧртэм звукоподражаниос но междометиос. «Моя Удмуртия»-ын ужа бигер редакция но.