Эктон корка (фольклор студия)

«Эктон корка» – удмурт калык эктонъя фольклор студия. Кылдытэмын 1997 арын толсур толэзе.

Шорсюлэм малпанэз

Удмурт калык культуралэсь дунлыкъёссэ, тужгес ик фольклорной наследизэ, улӟытон, утён но калык пӧлы ик вӧлмытон, обществолы калык культуралэсь кулэлыксэ валан но сое гажан мылкыд пыӵатон.

Ужезлэн öрез

Общественной но культурно-просветительской удысъёс пыр удмуртъёслэсь но мукет калыкъёслэсь крезьгуро но эктон фольклорзэс туала улонын азинтон, чеберлыкъя но югдытонъя (просветительствоя) ужын выль, альтернативной программаос но проектъёс дасян (обществомылэсь зэмос калык искусство но фольклор бордын кулэяськонъёссэ санэ басьтыса); республикамы фольклор движение кылдытон бордын уж нуон, сое радъян.

Ужезлэн пуштросэз

Венгриысь «táncház» движенилэсь амалъёссэ уже кутыса, «эктон корка» нимо фольклор ужрадъёсты (презентациосты, адзытонъёсты) радъян; концерт программаосты дасян; Удмуртиысь, Россиысь но кунгож сьöрысь фольклор ужрадъёсы (фестивальёсы, форумъёсы но мукет) пыриськон; удмуртъёслэсь но мукет калыкъёслэсь крезьгуро но эктон фольклор удысысь материалъёсты экспедиция амалэн люкан, соосты эскерон; вашкала удмурт крезьгуро инструментъёсты улӟытон но республикаысьтыты культуры удысын соосты вӧлмытон; крезьгуро но эктон фольклорлы сӥзем семинаръёсты, конференциосты, фестивальёсты, лагерьёсты но мукет ужрадъёсты дасянын юрттэт но экспертиза сётон; Россиысь но кунгож сьӧрысь чеберлык но тодос удысысь калыккуспо организациосын но центръёсын огъя уж нуон (ECTC - Европаысь калык культураез эскеронъя центр, Дуннеысь калык крезьгуръя кенеш, CIOFF – Дуннеысь фольклор фестивальёслэн кенешсы но мукет), ивор вöлмытонъя удысын зэмос калык искусствоез азинтон (радио, телевидение, газетъёс но интернет пыр аудио, видео но печатной продукциез вӧлмытон)

Историысьтыз чуръёс

Калык эктонъя «Эктон корка» студия кылдӥз 1997 арын толсур толэзе. Студилэн кылдэмезлы кичӧлтон сётӥзы А. Н. Прокопьев но солэн юрттӥсьёсыз, кин Удмурт шаерын фольклор движение кылдытон но калык культуралэсь дунлыкъёссэ калык пӧлы ик вӧлмытон малпанзэс улонэ пыӵатыны мылкыд каризы.

Студилэн туала улонэз

«Эктон корка» студия толэзьлы быдэ фольклор ужрадъёс ортчытъя, кытчы, студиысь артистъёс сяна, мылысь-кыдысь пырисько республикаысь пöртэм фольклор коллективъёс но. Сцена вылын фольклорез возьматонъя огдышем-огчаклам манеръёслэсь пöртэм луыса, «Эктон коркалэн» фольклор адӟытонъёсыз но концертъёсыз студиез карын улӥсь удмуртъёс пӧлын туж тодмо каризы. Та дыре калык эктонъя «Эктон корка» студия – удмурт шаерысь одӥгез валтӥсь фольклор коллектив.

1999 арысен кутскыса, «Эктон корка» студия нимысьтыз концерт программаосты дасянын но гастрольёсты радъянын бадӟым уж нуэ, Удмуртиысь, Россиысь но кунгож сьӧрысь фольклор ужрадъёсы пыриськылэ: Ижын ортчем финн-угор калыкъёслэн VII калыккуспо фольклор фестивалязы (1999) но финн-угор фольклоръя «Воршуд» фестивале (2002-2006) ; Чебоксарыысь «Родники Поволжья» нимо калык творчествоя VIII фестивале (2000); Финляндиысь Иматра карысь «UGRIJUHLA» нимо финн-угор культураослэн этнофутуризмъя калыккуспо фестивалязы (2000-2005); Эстониын ортчытэм «Ӵыжы-выжы калыкъёслы сӥзем нуналъёс-2000» ужрадэ; Эстониысь ик «BALTICA» нимо XIV калыккуспо фольклор фестивале, Выру городын ортчем VII калыккуспо фольклор фестивале, Вильянди карын радъям калык крезьгуръя IX калыккуспо фестивале (2001); Венгриысь Ясберень карын ортчытэм Европаысь ичи лыдъем калыкъёслэн фольклорзылы сӥзем калыккуспо фестивале но Печ карысь культурая калыккуспо арня нимо ужрадэ (2001).

2001 арысен студилэн крезьгур инструментъёсъя группаез вашкала удмурт крезьгуро инструментъёсты (кубыз, дымбыр, шуланъёс, бызгетон но мукет) улӟытон бордын ужа.

Студилэн туннэ репертуараз лымшор, уйпал, шор ёросъёсысь, ваткасьӧр но камсьӧр, Слободской палась удмуртъёслэн эктон, шудон, кырӟан но крезьгур сямъёссы; финн-угор но тюрк выжыосысь калыкъёслэн эктонъёссы; «Нуны сюан», «Пӧртмаськон», «Мажес ваён», «Аулак корка» но мукет обрядовой композициос.

Студиысь муртъёс

«Эктон корка» студилэн художественной кивалтӥсез – дуннеысь калык крезьгуръя кенеш бордын ужась этнохореологъёслэн калыккуспо огазеяськоназы пырись мурт, Удмуртиысь тодмо этнохореолог Андрей Прокопьев. Студиын ужасьёс – крезьгур, фольклор но культура удысъёсын дышетскем егит специалистъёс но Удмурт кун университетысь студентъёс. «Эктон коркалэн» крезьгур группаезлэсь ужзэ радъяло А. Кузнецов (арган, кубыз), А. Добряков (кларнет, цитра, бызгетон, шуланъёс), А. Кузьмин (арган, шуланъёс) но А. Прокопьев (кубыз, дымбыр, ымкрезь). Студилэн киуж чеберлыкъя но удмурт костюмъя постановщикез Н. Прокопьева, фольклор проектъёсыз но концерт программаосыз озьы ик дасяло Н. Кузнецова, В. Степанова (сюй мунёосъя но сюйлэсь лэсьтэм крезьгуро инструментъёсъя специалист), Е. Байкова (фольклор театръя öнерчи-этнограф), С. Кононова, Е. Ишмуратова, О. Овсянникова, Е. Петрова но мукет егит усточиос.