Вогау, Гаральд Вильгельмович
Гаральд Вильгельмович Вогау — оскон удысын ужась, лютеран пробст. Оскон удысэ выжемез азьвыл ужаз Ижысь Короленко нимо драмая ӟуч театрын режиссёр луыса но. Вордӥськиз 1922 аре, кулӥз 2007 аре 21 мае.
Пичи вакытсэ Вогау ортчытӥз сталин лагерьёсын. Отысен ик книгаез яратон мылкыдыз пуромиз - кечат-вамат укно сьӧрын пукисьёслы Библиез лыдӟылӥз. Нош Быдӟымнуналэ (Паскае) ваньзы ӵошен кырӟаллязы Stille Nacht («Чалмыт уй») кырӟанэз.
9-тӥ феврале 1991-тӥ арын Вогау Гаральд Вильгельмович Любовь кузпалэныз ӵош Ижын кылдытӥзы Лютеранъёслэсь общиназэс. Кык ар ортчыса, Дэри ёросысь Ягул черкогуртын усьтӥзы «Святой Пётрлэсь но Павеллэсь общиназэс». Общиналэн пасторез луиз Любовь Вогау, 1994-тӥ арысен котькуд нунал сямен отын богослужение нуылӥз. Доразы ӵемгес пыраллязы егитъёс, нош котькуд арнянуналэ соос Иже люкаськылӥзы.
Лютеран община нылъёслы-пиослы пыӵатыны вырылӥз ог-огдэ гажан но яратон мылкыдэз, лул-кужымдэ, ас культурадэ ӝутонэз.
Таӵе пичи общиналэн бадӟым ужъёсын вырыны ӟигарыз но, кужмыз но ӧзгес тырмылы. Озьы ке но отчы пыриськисьёс котькуд нуналзэс пайдаё ортчытыны вырылӥзы - колониосы, йыртэманы яратӥсь быдэ вуымтэос, пытсэт сьӧрын пукисьёс доры пыраллязы. Лютеранъёс, котькуд адямиен лулысь-сюлмысь вераськыса, шуг-секытъёссэ палэнтыны вырылӥзы. Кинлэн ке ӵыжы-выжыез-а висе, юртъерзэ-а тылпу ньылэ, сюрес вылын кышкыт учыре-а шеде - калыклэсь уксё бичаллязы, благотворительностен вырылӥзы.
2007-тӥ арын 21-тӥ мае 84 аресказ Гаральд Вогау - Россиысь Евангельско-Лютеранской черклэн Генеральной Синодаз пырись мурт, Ижысь Христос Утисьлэн черкезлэн пробстэз (валтӥсь пасторез) - улонысь кошкиз.