Liebe Deinen Nächsten

«Liebe Deinen Nächsten» (ӟуч Возлюби ближнего своего) — Эрих Мария Ремарк немец гожъяськисьлэн романэз. Со бордын автор 1938-тӥ арын ужаны кутскем, йылпумъям 1939-тӥ арын. 1941-тӥ арын романъя So Ends Our Night кино пуктэмын, собере ик — нимаз книга поттэмын.

Пуштросэз

Романын возьматэмын Нырысетӥ дунневыл ож бере вакыт, Европаысь секыт улон. Мур возьматӥське Германиын улӥсь еврейёслэн трагедизы: та калык куинетӥ сорт лыдъяське, сое уг куто уже, талало документъёссэс но ысто палэнэ, кунгож сьӧры, кытын соосыз нокин уг возьма. Котыр алдаськисьёс, лушкаськисьёс, чагиськисьёс трос, соин адямиослэн осконзы быре. Эмигрантъёслэн семьяоссы куашкало, соос нимаз, котькудӥз аслэсьтыз улонзэ утьыны тыршыса, аслыз выль улон инты утча, но туж ӧжытэз шедьтэ. Эмигрантъёс трос луэмен, вань кунъёсын катъёс чурытгес каремын, туж секыт басьтыны паспорт, кунын улыны но ужаны лэзись документъёсты.

Быдэс роман ӵоже валтӥсь геройёс — Людвиг Керн но Рут Холланд, озьы ик соослэн эшъёссы (тужгес матысез — Штайнер) — кунысь кунэ ветло, тюрьмаын пуко, ужаса поттэм копейкаосынызы уло. Валче, эшъяськыса улэмзы гинэ шуг-секытъёсыз вормыны юрттэ.