Валтӥсь меню усьтыны
Удмурт дунне

Dart — удмурт егитъёслы сӥзем газеты, "Удмурт дунне" газетлэн ватсэтэз.

Dart газетлэн нырысетӥ номерез потӥз 2011-тӥ арын 26-тӥ толшоре. Газетэз кылдытонлэн валтӥсь мугъёсыз герӟаськемын егитъёслэн улоназы Интернет мур пыӵамен, выль, туала егит лыдӟисьёс будэмен. Зинаида Рябинина «Удмурт дунне» газетлэн редакторез нырысетӥ номераз гожтэ: «Егитъёсын пумиськонъёс дыръя матысьгес эшъяськыны ӵектэммылы соос, шумпотэм гинэ ӧвӧл, юрттӥськыны дась луэмзы сярысь веразы: сётэ гинэ милемлы амал, ми ваньзэ лэсьтом!»[2]. Ваньзэ тае лыдэ басьтыса, кылдытэмын вал котыр ласянь туала газет. 4 ар ӵоже Dart туала удмурт егитъёс пӧлын тужгес тодмоез но лыдӟымонэз газет луиз.

Dart «Удмурт дунне» газетлэн егитъёслы сӥзем ватсэтэз луэ, потэ 8 полосаен А3 форматэн толэзяз одӥг пол, тӧдьы но сьӧд буёлъёсын. Тиражез али дырлы 1600 экземпляр котырын. Пуштросэзъя 16-30 аресъем удмурт егит лыдӟисьлэсь тунсыкъёссэс лыдэ басьтэ. Газетлы нимаз гожтӥськыны луэ почта но редакция пыр, куд-ог интыосы нуллэ курьер. Газет нимысьтыз уж нуэ вотэсын, «Вконтакте» мерлыко бамын. Газетэз быдэсак асьсэос егитъёс лэсьто: сое поттон понна кыл кутӥсьёс номерлэсь темазэ малпало, суредъёс утчало-лэсьто, егит авторъёсты материал гожтыны куро.

Пӧртэм дыре егитъёслы Dart ватсэтэз поттон понна пӧртэм адямиос кыл кутӥзы, озьы солэн тусыз но пӧртэм луылӥз. Таин сэрен газетлэсь улон сюрессэ 3 вакытлы люкыны луэ:

1. 2011-тӥ ар. Газетэз поттыны оскемын 1998-тӥ аръёсы «Удмурт дуннеын» «Дарт» бамез поттӥсь Елена Никитиналы. Та вакытэ газет пыд йылаз султыны выре. Ӧй вал гожъяськись егитъёсын шыкыс. Елена Никитина ачиз сётъялляз авторъёслы пӧртэм ужъёс: мода сярысь Полина Кубистаез гожтыны курылӥз, ортчем ужрадъёс сярысь - Дарали Лелиез, яратон сярысь - Лукерья Шиховаез, туала тодметъёс (вотэсэн герӟаськем югдуръёс) сярысь - Роман Казаковскиез. Материалъёс тырмымтэ дыръя блогъёсысьтызы юрттӥзы блогысь Ирина Зангариклэн, Дарали Лелилэн, Наталья Романовалэн, Наталья Михайловалэн постъёс. Та дыре кылдӥзы пӧртэм рубрикаос: «Зарни егитъёс», «Мода», «Малпан», «Тодматскон», «Культпросвет», «Кытынкумар». Тросэз соос али но газет бамъёсын уло на. Ӧжыт вал лэчыт ужпумъёсты ӝутъясь материалъёс, соосты нимысьтыз гожтыны курылӥзы дышетскем адямиосты. Озьы ик лэчыт юанъёс ӝуткаськизы «Культпросвет» рубрикаын, татын печатласькизы тодмо но дано адямиосын интервьюос. Трос гожъяськон усьылӥз номерез поттон понна ачиз кыл кутӥсь вылэ. Та вакытэ кылдӥзы «Вконтакте» но Facebook мерлыко бамъёсын, isuu.com порталын нимысьтыз Dart аккаунтъёс.

2. 2012-тӥ ар. Егитъёслэн газетсылы ар тырмонэныз валче Ижысь огаз уй клубын ортчиз ужрад, кытын радъяськиз вераськон. Ужрадын газетлэн биньгозыез сётэмын вал со дырлы газетэ трос гожъяськись удмурт азьмынӥсьлы Алёна Петровалы (Дарали Лелилы). Та вакытэ газет пуштросэзъя но, вылтусызъя воштӥське. Нырысетӥ полосаын чебер но вылӥ ӟечлыкен туспуктэмъёс, суредъёс кылдӥзы. Азьвыл соос нырысетӥ бамлэсь ¼ люкетсэ басьтӥзы, али - ӝыны, яке воксё быдэс бамез. Дарали Лели учкылӥз Мускоысь «Афиша» но мукет туала журналъёслэн пуштроссы, дизайнзы шоры. Газетэ мукет но воштӥськонъёс пыризы: 2-тӥ баме номерысь валтӥсь темаосты верась тегъёс потӥзы. Азьвыл «Дарали куара» рубрика пӧрмиз редакторлэн колонкаезлы. Дарали Лели лыдӟисез котьку тодматъяз кунгож сьӧрысь туала культураен, искусстволэн выль ӧръёсыныз. Соин сэрен газетлэн бамъёсаз трос англицизмъёс но неологизмъёс пумиськыны кутскизы. Дарали Лели газетэз калык пӧлы вӧлмытонъя пӧртэм амалъёсты кутӥз: егитъёслы уй позыръяськонъёс, концертъёс но акциос радъялляз, гуртъёсын егитъёсын пумиськонъёс ортчытъяз. Отын газетлы гожтӥськон но газетэз тодмо карон ужпумъёс пуктылӥз, «ВКонтакте» но «Facebook» мерлыко бамъёсты нуиз. Та дыр газетлэн пушъён вакытэз луиз, та сярысь верало мерлыко вотэсын газет сярысь вераськонъёс, лыдӟисьёс вискын кенешонъёс, кылдэ зэмос интерактив.

3. 2014-тӥ арын газет бордын ужаны кутско мукет егитъёс: Мария Векшина, со вакытэ журналистикая факультетын дышетскись егит гожъяськись, «Удмурт дунне» газетысь егит дизайнер Вера Штыкова но Тарту университетын докторантураын дышетскись Анастасия Шумилова. Газет воштӥськиз пуштросэзъя но, вылтусызъя но. Котькуд номер кыӵе ке темалы сӥземын луэ: экология, нылкышно но воргорон кусыпъёс, искусственной интеллект, мультфильмъёс. Куд-ог номеръёс сӥземын мерлыкез бугыртӥсь яке удмуртлыкын тужгес пусйымон учырлы. Кылсярысь, Богдан Анфиногеновлэн «Айшет будущего» кылбур бичетэз потэм бере 2014-тӥ арысь толсур номер егит кылбурчилы сӥземын вал, нош шуркынмон номер - Удмурт кун университетысь журналистикая но Удмурт филология факультетъёсты огазеянлы.

Воштӥське газетлэн вылтусыз но. Газетлэн али дизайнэз туала куронъёсъя радъямын: йыръянъёсын но врезъёсын засечкаостэк вакчи шрифтъёс кутӥсько (Museo Sans), бамъёсын юромо кельтӥсько буш интыос (омыр), материалъёс ӵемысь вакчиесь луо, кузьёсыз люкемын рубрикаосын, интервалъёсын, материалъёслэн валтӥсь малпанъёссы висъясько врезъёсын, газетэ пуктылӥсько бадӟым но умой ӟечлыкен туспуктэмъёс я суредъёс.

Суред но материал газетын кылдыто одӥг образ - котькуд суред, туспуктэм материал борды нимысьтыз утчаське/лэсьтӥське, котькудӥз аслаз стиленыз висъяське (коллаж, графика, суред, туспуктэм, иллюстрация). Соосты лэсьтон понна уже кутӥсько туала программаос Adobe Photoshop но Adobe Illustrator. Та ласянь газет бордаз кыске туала егит усточиосты - туспуктӥсьёсты но суредась Евгений Бикузинэз (Чудья Жени), Ксения Ворончихинаез, Денис Корниловез, Марина Сергееваез, Андрей Першинэз, Евгений Ардашевез но мукетъёссэ. Озьы ик пусйыны кулэ, газет ивор сётонъя выль графической амалъёсын ужа: пумиське инфографика, комиксъёс но графика амалэн быдэстэм йыртӥянъёс.

Газетлэсь нырысетӥ макетсэ лэсьтӥсь дизайнер Алексей Шкляев вера: «Dart газет аслаз дизайнэныз Мускоысь валтӥсь изданиослы укша: шонер кутӥсько суредъёс но туспуктэмъёс, куд-ог материалъёс суред вылэ ик пуктӥсько. Подпись сяна, материал борды итылӥсько авторъёслэн ымныръёссы, соос круг формаен сётэмын. Но куддыръя валантэмъёс кылдо, кудаз материал борды авторлэсь туспуктэмзэ пуктоно, кудаз ӧвӧл. Газетлэн макетэз туж умой лэсьтэмын, озьы ке но динамичностез уг тырмы. Пӧртэм жанръем материалъёс газет бам вылэ пӧртэм сямен пуксё. Верос пуктӥське бадӟым туспуктэм вылэ ик, юалляськонъёсын респондентъёслэн ымныръёссы круге сётӥсько, вакчи иворъёс одӥг радын сыло, аналитической материалъёс борды ватсасько диаграммаос, таблицаос. Соос лыдӟисез кыскыны юртто, материалэз радъяло но солэсь ымнырзэ кылдыто».

Али дыре лыдӟись дышемын вакчи, капчи но яркыт материалъёслы. Кызьы И. Заппатерра (Yolanda Zappaterra) Editorial Design ужаз гожтэ: «Интернет чаляк малпаськыны быгатӥсь, чидасьтэм лыдӟисез кылдытӥз, кудӥз газетлэсь возьма радызъя тырем иворъёсты» [3]. Озьыен, чебер суредъёсты, инфографикаез сяна, тунсыко материалъёсты но. Dart газет авторъёс азе ужпум пуктэ: материалъёс тунсыкоесь, эмоциональноесь но тыроесь луыны кулэ. Туала егитъёс котьмаин тунсыкъясько, дуннеез котыръяло - таос сярысь соос газетэ гожъяло. Dart газетлэн авторъёсыз - азьветлӥсь но котьма быгатӥсь егитъёс. Соос пӧлын егит дизайнер Вера Штыкова, мур но тунсыко гожъяськисьёс Настя Шумилова, Марина Пахомова, Алёна Петрова (Дарали Лели), Настя Тутаева но мукетъёсыз; Туспуктӥсьёс, суредаськисьёс Евгений Бикузин (Чудья Жени), Ксения Ворончихина (Ксюша Чимали), Денис Корнилов, Марина Сергеева (Удмурточка) но мукетъёсыз. Котькудзылэн дунне шоры учконзы но темазы асьсэлэн, соин ик газетэз но соос тунсыкогес каро. Вераны кулэ, тросэз авторъёс ӧвӧл дышетскемын журналистлы, соос уг тодо жанръёслэсь аспӧртэмлыкъёссэс, уг ужало редакциын. Соин сэрен текстъёссы - трос жанръёслэсь сурет. Таӵе материалъёсты колонкае яке блоге гожтэм пост шуыны луоз. Талэн умой палыз - ортчем ужрад бере егитъёс мӧзмыт отчёт уг гожто, со понна асьсэ малпанъёссэс шараяны тыршо.

Газетэз жанръёсъя дунъяд ке, ӵемысь пумисько репортажъёс (М. Пахомова «Куарагур гурла», Дарали Лели «Удмурт Ренессанс»), кунгож сьӧры ветлэмзы сярысь очеркъёс (К. Ворончихина «Isn’t it good, norwegian wood», В. Штыкова «Трос ымныро, бадӟым сюлэмо»), фин-угор конференциосысь отчётъёс (Л. Рябина «Мар уз луы Википедиын, со уз луы улонын», Н. Тутаева «Удмурт рэп воректӥз»), книгаослы, киноослы рецензиос (А. Шумилова «Берыктон пурты», В. Штыкова «Пылесос малпаське?»), тунсыко адямиосын интервьюос (М. Векшина «Пичи жанръем адями», Л. Шихова «Чумолё?»), ужпумъёсты сэрттӥсь-пертчись материалъёс (П. Эль «Кавер, ремикс яке плагиат», Н. Шумилова «Кӧня сылэ вӧсям ӝук?»). Куд-ог авторъёс - П. Эль, С. Коньков, С. Коробов, И. Трубицына, К. Шкляева - гожъяло ӟуч кылын - со пӧртэм удысъёсысь специалистъёс. Dart газетысь трос пумо рубрикаос «крезьгур», «мода», «зарни егитъёс», «культпросвет», «кино», «книга ӝажы», «иворъёс» шоры учкыса, валаськод: газет котькыӵе удысэз лыдэ басьтэ. Пуштросэзъя журнал доры. Кылыз ласянь Dart газет кылчиослэсь но писательёслэсь трос тышкаськонъёс кылэ. Егитъёслэн гожъяськон амалзы пӧртэм луэ. Материалъёсазы соос пырто англи, ӟуч но юромо малпам выль (блогер - «чурали», модель - «модали») кылъёсты. «Кенеш» журналысь проза отделлэн валтӥсь редакторез О. Г. Четкарёв шуэ: «Куддыр Dart газетлэн материалъёсыз туала кылбурчилэн Богдан Анфиногеновлэн гожъямъёсызлы укшало: суро-пожо, ӟучо-удмурто». Dart газет лыдӟисьёсын кусып возьыны турттэ. Литературной ӝытъёс, творческой пумиськонъёс радъя, концертъёс ортчытъя, лыдӟисьёсын пумиськонъёсы гуртъёсы пота (Алнаш ёросысь Байтэрек гурт, Шаркан ёросысь Ляльшур гурт).

Улон азинскемен валче газетлы оглом куронъёс но воштӥсько. Али дырлы Dart бордын тыршисьёс, лыдӟисьёсты город улонэн тодматэм, гурт егитъёслэсь асваланзэс ӝутэм сяна, ас азязы мукет но ужпумъёс пукто: - гожъяськись авторъёсты но лыдӟисьёсты будэтон; - Dart-лы аслэсьтыз сайтсэ лэсьтон; - лыдӟисьёсын интерактив кылдытон; - газетлэсь электрон вариантсэ турлы буёло карон; - Dart-эз брендлы пӧрмытон.

Та ужпумъёс бордын Dart газет азьланяз ужалоз.

Россиын информационной ӧрлэн аслаз аспӧртэмлыкъёсыз, но арысь аре шундыпуксён палась информационной культура пыӵа асьме культурае но. Удмурт егитъёс, вераны кулэ, мукет калыкысь егитъёсын оградын вамышъяло. Глобализация ӵушылэ калыкъёс вискысь борддоръёсты, ӧжыт лыдъем калыкъёс адӟем каро трос лыдъемъёсызлэсь. Удмуртъёс али шундыпуксён палась фин-угор кунъёсын ӟеч кусып возё, конференциосы ветло, пӧртэм культураосын тунсыкъясько. Газетлы куронъёс чурытгес луо. Туала удмурт культура сярысь йырмес выллань ӝутыса веран понна кыл кутыны кулэ котыр ласянь ӟеч газет (пуштросэзъя, дизайнэзъя, калыкен ужамезъя) поттон понна но. Dart газет та куронъёслы быдэсак тупа.


ЛитератураТупатон

1. Кельмаков В. К. «Удмурт дуннелэн» но Удмурт дуннелэн гожъяськонысьтызы куд-ог лэчыт ужпумъёс: Азьпечатлос / Удмурт кун университет. Огъя но фин-угор кылтодонъя кафедра. Ижкар: «Удмуртский университет» книга поттон корка, 2003. - 98 б.

2. Рябинина З. Егитъёслэсь ӟырдыт салам // Dart. 2011. 26-тӥ толшор.

3. Zappaterra Yo. Editorial Design. Laurence King Publishing LTD, 2007. 208 p.

4. 2011-тӥ - 2015-тӥ аръёсы потэм Dart газетлэн номеръёсыз.