Дунне кыстӥськон сярысь закон

Дунне кыстӥськон сярысь закон (Ньютонлэн кыстӥськон сярысь законэз) — универсальной инкуазь законъёс пӧлысь одӥгез. Та законъя ваньмыз материальной арбериос ог-огзэс кыско, соин ӵош ик кыстӥськон кужымлэн быдӟалаез уг герӟаськы арбериослэн физика но хими аслыкъёсынызы, соослэн вырылонэнызы, соосыз котыртӥсь пӧллэн аслыкъёсыныз. Музъем вылын кыстӥськон шараяське нырысь ик секытлыклэн кужымез луэмен, кудӥз Музъемлэн котькыӵе материальной арбери кыскемезлэсь кылдэ. Таин герӟаськемын термин «гравитация» (лат. gravitas — «секытлык»), «кыстӥськон» кыллы эквивалент луись.

Ньютонлэн кыстӥськон сярысь законэз

Дунне кыстӥськон сярысь закон XVII даурын англи тодосчиен Исаак Ньютонэн усьтэмын вал. Закон озьы вера:

Котькыӵе кык арбериос ог-огзы борды кыстӥсько сыӵе $F$ кужымен, кудӥз меӵак пропорциё соослэн $m_{1}$ но $m_{2}$ массаоссылы но берлань пропорциё соос куспысь $r$ кузьдалалэн квадратэзлы:

$F=G\cdot {m_{1}\cdot m_{2} \over r^{2}}$.

$F$ кужым та арбериосыз герӟась шонер гож кузя ӧръяськемын. Пропорци коэффициент $G$ — вошъяськисьтэм лыд (гравитаци яланлыд), СИ системаын G = 6,67408(31)·10⁻¹¹ м³/(кг·с²).