Дэри черкогурт

Черкогурт Дэри черкогурт 56°47′25″ с. ш. 53°22′50″ в. д. Шаер Россия Территория 19 км² Улӥсьёс 11 066 адями (2021) Плотность 486,4 адями/км² Часовой пояс UTC Телефон код 3412 Почта индексъёс 427000 Официальной сайт zavjalovo.ru

Дэри черкогурт

Дэри черкогурт ВикиCommons-ын

Дэри (яке Завьял, ӟуч Завьялово) — Удмурт шаерысь бадӟым черкогурт, Дэри ёрослэн но Дэри гурт поселенилэн шорсюлмыз. Татын улэ 10 сюрс 384 адями. Интыяськемын Быдвай шур дурын. Дэри черкогуртысен Ижкарлэн шорезозь — 12 иськем, гожезозь — 6 иськем.

Нимызлэн кылдэмез

Филология наукаосъя доктор М. Г. Атаманов Дэри топонимлэсь кызьы кылдэмзэ тазьы валэктэ: нырысьсэ Дэри сярысь веран пусъемын 1710-тӥ арын ортчем переписьын. Арске нуись сюрес вылын Дери-Чудья гурт пе вань — со ик Завьялово. Завьял — гуртэз кылдытӥсьлэн нимыз. Дэри гурт ним потэмын Дерьянка шурлэн ӟуч нимыз бордысь, дэри, напра шуэмез возьматэ. Чудья — удмурт воршуд ним.

Историез

1710-тӥ арын гуртын 55 юрт вылэм, улӥсьёсыз чын удмуртъёс гинэ, пе.

1859-тӥ арын ортчем ревизияя Дэри черкогуртын вылэм 96 юрт. Гуртын улӥз 731 адями. Татын ужаз почта, тодон-валан сётонъя училище, 4 вуко но кебит.

1917-тӥ арозь Дэри черкогурт пичи вылэм. Татын ульчаос но туж вакчиесь вал. Тужгес кузь урамез Бадӟым ульча нимазы. Туннэ сое Пугачевлэн урамез нимало. Мукетыз чебер урам — Черк ульча. Татын ветлыны ӧз лэзе пудо-животэз. Али та Октябрь урам луэ. Нош бӧрысь удмурт ульча нимъёсты воштӥзы ӟуч нимъёс. 20-тӥ дауре татчы трос ӟуч калык вуиз. Соин черкогуртын кылдӥсь ульчаослы но ӟуч нимъёс лякиськизы. Озьы Дэриын кылдӥзы Южный-1, Южный-2, Медик, Пугачёвский, Солнечный, Северный микрорайонъёс.

1929-тӥ арын Вотской областьын кылдӥз Иж ёрос, отчы ик пыриз Дэри черкогурт но. Озьы ке но 1937-тӥ арын кылдӥз Дэри ёрос, солэн шорсюлмыз луиз Дэри черкогурт.

Инфраструктураез

Туннэ Дэри черкогуртын вань шоръёзо школа, спортъя школа, кык нылпи сад, пионеръёслэн юртсы (усьтэмын 1967-тӥ арын), культурая юрт, ёрос больница. 2000-тӥ арын черкогуртын усьтӥськиз шаертодонъя музей.

Дэриын трос вузъюртъёс ужало. Соос пӧлын 4 супермаркет вань: 1 «Ижтрейдинг», 1 «Магнит» но 2 «Пятёрочка».

Транспорт

Завьял — автомобиль сюрес герд. Татын Гольян шоссе герӟаське Ижкарлэн котырес сюресэныз. Кык чуръем Гольян шосселэн Иж но Дэри вискын люкетэз автотранспортэн ялан тырмытэмын.

Ижысен Дэриозь трос транспорт мынылэ: 301-тӥ, 319-тӥ, 321-тӥ, 357-тӥ номеро автобусъёс, 341-тӥ, 353-тӥ (363-тӥ), 367-тӥ номеро маршрутъя таксиос. Соослэн мынонзы-ветлонзы радъямын черкогуртын кык автомобиль сюрестӥ гинэ: Гольян урамтӥ но Калинин урамтӥ.

Спорт Дэриын

Спортэз азинтон удысын но черкогуртын трос вормонъёс басьтэмын. Татысь стадионъёсын толалтэ но гужем кӧня ке пол ини радъяськылӥзы республикаысьтымы гурт шудонъёс. Таӵе ӵошатсконъёсын Дэри ёрослэн командаез котьку вылӥ интыос басьтэ. Уго Дэриысь спортсменъёслэн вань адӟем карымон адямиоссы: калык куспо классъем спортъя мастер, дуннеысь чемпион Нина Парамонова, тодмо биатлонистъёс, агай-вынъёс Валерий но Сергей Журавлёвъёс, биатлонъя дуннеысь чемпион Александр Ушаков.