Камбаркаын кышкыт жуг-жагез быдтонлы пумитъяськылон
Камбаркаын кышкыт жуг-жагез быдтонлы пумитъяськылон кутскиз 2019-тӥ арын инвожо толэзе, Россиысь правительстволэн 540-тӥ номеро постановлениезлэн шарае потэмез бере. Та постановлениын Россилэн премьер-министрез Д. Медведев юнматӥз федерал властьёслэсь медэмъёссэс кышкыт кылем-мылемзэ возёнъя, переработкая но утилизацияя комплексъёсты лэсьтыны. Соосыз пуктыны чаклало хими оружиез быдтон интыосы — Удмуртие но Киров, Курган, Саратов улосъёсы. Удмурт шаерын таӵе комплексэз интыян понна Камбарка кар быръемын вал, кытын 2006—2009 аръёсын люизит быдтылӥзы.
Ӝоген шараяськизы мукет кышкатъясь фактъёс но:
- Камбаркае арлы быдэ 50 000 тоннаозь туж кышкыт жуг-жагез вайылон чакламын. Со луоз, лэся, сьӧрлось жуг-жаг (Россилэн мукет улосъёсысьтыз яке кунгож сьӧрысь), угось Удмуртия та лыдпуслы матэ но сыӵе кылем-мылемез уг потты.
- I но II классъёсы пырись веществоос — токсичноесь, тазалыклы тужгес кышкытэсь. Со сяна, инкуазе шедьыса, соос солы тупатонтэм изъян лэсьто.
- Комплексэн кивалтоз «РосРАО» — радиоактивной кылем-мылемен ужанъя предприятие.
Протестъёслэн азьланьтӥськонзы
ТупатыныКамбаркаысь кышкыт предприятиез улӟытыны чаклан сярысь ивор вань Удмуртиез бугыртӥз. Социал вотэсъёс вожпотэм комментарийёсын куашетыны кутскизы. 5-тӥ инвожое Камбаркаын улӥсь Надежда Кузьмина Change.org сайтын онлайн-петициез кылдытӥз, утилизировать каронъя завод лэсьтонэз алыны курыса-косыса. Кык толэзьскын со петиция улын 18 сюрслэсь трос адямиос гожтӥськизы.
Калыкез буйгатыны турттыса, шаерысь общественной палата 13-тӥ инвожое Камбаркаын чиновникъёсын но экспертъёсын пумиськонэз ортчытӥз. Ужрадэ пыриськыны яра вал ваньмызлы мылкыд карисьёслы (азьвыл ик регистрациез ортчемъёслы). Пумиськон дыръя солэн спикеръёсыз люкаськемъёслэн тросэзлы юанъёссылы валэктонъёсты сётыны ӧз быгатэлэ. Ужрадэз йылпумъям бере камбаркаосты ӧтизы заводлы пумит чаклам митинге.
Митинг ортчиз ӵукна 22-тӥ инвожое. Камбаркаысь властьёс сое ортчытонлы олокызьы но люкетыны дауртӥзы: акциез ортчытон инты выжтэмын вал городлэн шорысьтыз пумаз — «Юность» нимо стадионэ; бюджетникъёсыз кышкатъязы ужысь куштонэн. Озьы ке но, 22-тӥ инвожое митинг удалтӥз, трос сю адямиосты люкаса. КПРФ партиен радъям ужрадэ вуизы камбаркаос гинэ ӧвӧл, бускель бадӟым каръёсын улӥсьёс но. Люкаськемъёс азьын выступить каризы интыысь активистъёс но Ижысь, Сарапулысь, Нефтекамскысь, Чайковскысь куноос. Митингез йылпумъяку, акцие пыриськисьёс кутӥзы резолюциез, кудаз завод лэсьтон сярысь юанэз референдуме поттон куремын вал.
Камбаркаысь акция луиз кутскон гинэ. Пӧсьтолэзе ини митингъёслэн тулкымзы быдэс Шор Прикамьеез шобыртӥз. Камбаркаын кышкыт кылем-мылемез быдтонлы пумит акциос ортчизы Удмуртиын но, Башкортостанын но, Пермь шаерын но.
Удмурт шоркарын нырысетӥез та темалы сӥзем митинг 5-тӥ пӧсьтолэзе ортчытэмын вал. Сое радъяз Россиысь социализмо движенилэн Ижысь люкетэз. Акцие лыктӥзы пӧртэм дунъямъёсъя 350-ысен 500 адямиозь. Калык черекъяз лозунгъёсты: «Бречаловез — отставкае!», «Росатом, выжт Удмуртиысь!», «Лэсьтӥськелэ Рублёвкаын!». Митингын кыл сётэмын вал общественной активистъёслы, Ижын, Камбаркаын, Сарапулын но Чайковскын улӥсьёслы.
Музон нуналэ, 6-тӥ пӧсьтолэзе, митинг люкаськиз Сарапулын. Интыысь коммунистъёсын радъям акция ортчиз кар пумын, «Электрон» культура юрт вӧзын. Ужрадэ пыриськизы 300 адямилэсь трос.