Кузебай Герд нимо гимназия

Кузебай Герд нимо гимназия — Удмуртиысь национальной кадръёсты будэтонъя инты. Интыяськемын Ижысь Петров ульчаысь 19 номеро юртын.

Удмуртилэн шоркараз удмурт нылпиослы чаклам нимаз дышетон учреждение кылдыттон сярысь малпан вордскиз 1990-тӥ аръёслэн кутсконазы. Улонэ со пыӵаны ӧдъяз 1994-тӥ арын. Соку городысь огаз нылпи садын усьтӥськиз пичи школа. Татын пиналъёсты будэтӥзы нылпи садысен. Чаклазы, азьланяз пиналъёс одно ик вамыштозы гимназие. Та ужлы кутскон сётӥз директор Ольга Константиновна Шилова.

Татчы люкаськизы усто дышетӥсьёс. Кылдӥз удмурт кылэз дышетонъя ӟеч методика. Вал гимназилэн историяз пумитъяськон вакытъёс но. Удмурт анай-атайёс возьмазы гимназилы ӟеч юрт висъянэз. Вылӥ кивалтӥсьёс оскытӥзы город шорын школа сётыны. Но со интые, 2004-тӥ арын гимназиез келязы город пумысь 21 номеро школае.

Директоре юнматӥзы удмурт кылэз тодӥсьтэм муртэ. Валамон, югдур лэчытомиз, сое тупатон но радъян понна трос дыр быриз.

2006-тӥ арысен гимназиен кивалтэ Анжелика Семёновна Михеева. Со вордскемын Дэри ёросысь Подшивал гуртын. Йылпумъяз Удмурт кун университетысь филология факультетэз. 2007-тӥ арын быръемын Удмурт Республикаысь Кун Кенеше депутатэ.

Туннэ гимназиын тодон-валан люка ??? мурт. Со пӧлысь ??? процентэз тодэ но вераське удмурт кылын. Со сяна, татчы мыло-кыдо лыкто гуртысь нылпиос. Соослы гимназиын люкам тодон-валанзы юрттэ улонын асьсэды шедьтыны. Гимназиез йылпумъясь егитъёс котьку висъясько ӟеч тодон-валанъёсынызы. Соос капчиен дышетскыны пыро Удмуртиысь но Россиысь вузъёсы. Кузебай Герд нимо гимназиез пыр потэмъёс пӧлын удмурт эстрадаысь егит кырӟасьёс Эльвира Панченко но Снежана Эскандерова. Ватсаны кулэ: гимназилы дасян но дышетон уж радъяське нылпи садысен. Матысь дыре сое чаклало выжтыны школа борды.