Михаил Покчи-Петров

Михаил покчи-петров» бамысь кудланьтэмын)

Михаил Покчи-Петров (зэмос нимыз Михаил Петрович Петров) вордскиз 1930 аре Можга ёросысь Бадӟым Сибы гуртын.

Можга педучилищеез йылпумъяса, со Удмурт пединститутэ пыре, отын одӥг ар дышетске но Москваысь театральной искусствоосъя институтэ мынэ.

Бертэ, режиссёр луыса, Удмурт театрын спектакльёс пуктэ («Чукдор», «Вуж Мултан» но мукет), ачиз ик рольёсты шудэ. Г. Корепанов-Камскиен, Г. Корепановен но мукетъёсыныз кырӟанъёс гожъя, радиоын ужа. Кылбуръёсын «Тодматскон» но «Малпаськон» нимо бичетъёс поттэ. Но сое лек адӟон возьма вылэм: пыласькыкуз, зымон сяменыз, сюрлызэ чигтыса, кулэ.

«Со бурдъёссэ гинэ вӧлъяз вал ай, нош лобӟыны ӧз вутскы». «Аратэм пужым пу сямен, кужмо гомаз, ӝуаз, дыртӥз. Со улонысь кобыен омыръям сямен лодсаз вань умойзэ, кулэзэ, чеберзэ». Тазьы гожто удмурт писательёс М. Покчи-Петров сярысь.

М. Покчи-Петров туж эшъяськылӥз Гай Сабитовен. Со ик солы «Покчи» ним кутыны дэмлам, малы ке шуоно Михаил Петров удмурт литератураын вал ини. Нырысь, пе, сюлэмызъя ӧй вал, малы ке шуоно еж луэмзэ, пе, возьматэ, нош берло дышем.

Одӥгез тодмо кылбурез:

Кык сяськаос Тупатыны

Тудвуос ортчыса, кезьытъёс бырыку,

Тулыс куазь дуннеез улӟытон вакытэ,

Возьвылысь бадь улэ вож турын потыку,

Кык лемлет сяськаос ӝужазы вал артэ.


Одӥгез льӧль сяська сокем ӝог ӝутӥськиз,

Шӧдыны но ӧз луы солэсь будэмзэ —

Ваньмызлэсь ик азьло усьтӥськиз,

Возьматскиз,

Шундылэн син шораз мальдытӥз льӧль бамзэ.


Кузь будэм мугорзэ тӧл азьын сэзь шоназ,

Ӵук лысву шапыкез бичалляз ки вылаз.

Вӧзысьтыз турынэз нош ватӥз вужераз,

Вож куакысь уӵыпи но сое кадь данъяз.


Мукетыз нош сяська тэк будӥз ас понназ,

Котыраз пушйизы турын-куар эшъёсыз.

Со будӥз но чебер усьтӥськиз ас дыраз,

Музъеме пыдлогес кошкизы пыдъёсыз.


Зор бере куар вылысь лыс вуэн мисьтаськиз,

Пилемо куазь дыръя юн мӧзмиз шундылэсь,

Тол шорын эшъёсыз пӧлын ик веттаськиз,

Тусбуйзэ уноез ӧз но адӟе солэсь.


Одӥг пол лек пужмер шӧдтэк шорысь усиз,

Музъемлэсь вӧсь луись бам вылзэ чепыльтӥз.

Чеберез льӧль сяська соку ӝог кусӥнскиз,

Нош востэм будэмзэ турын-куар шобыртӥз.

<Удмурт литература: 7-тӥ класслы учебник-хрестоматия /Дасяз С.Т. Арекеева. - Ижевск: Удмуртия, 2004.>