Мориа, Поль

Поль Мориа́ (фр. Paul Mauriat) — быдэс дуннелы тодмо композитор, дирижёр но аранжировщик, Россиын тужгес тодмо француз крезьгурчи. Вордскемын Марсельын 1925 аре 4 мартэ крезьгурчиослэн семьяязы. Пинал дырысен ик вуоно крезьгур талантсэ синйылтыны луэ вал: ньыль аресысен Поль шудыны кутскиз фортепьяноен, соин ик солэн атаез ыстӥз егит Полез (солы дас арес гинэ вал соку) Марсельысь консерваторие. Консерваториез Поль азинлыко быдтӥз фортепиано классъя. Отын сое классической крезьгурлыгес дышетылӥзы ке но, ассэ сое ас бордаз трослы кыскиз джаз. 17 арес луыса Поль люка аслэсьтыз нырысетӥ орекстрзэ но та эшъёсыныз ӵош отӥ-татӥ ветлэ Франциетӥ. Кӧня ке дыр улыса, со тунсыкъяськыны кутскиз эстрада крезьгурен, гожтэ популярной крезьгуръёслы нырысетӥ аранжировкаоссэ.

Солэн нимыз тросэзлы тодмо луэ, но 1958 аре, Париже лыктэм бере, солы но солэн оркестрезлы грамзаписья одӥгаз фирмаын аккомпанемент карыса ужаны ӵектӥллям. Поль Мориа ужаз аранжировщик луыса но, собере та ужен ӵош аслэсьтыз композициоссэ но кылдытыны кутске. Соос уката ик йылэтӥзы Польлэсь данзэ: пӧртэм вакытъёсы со гожтэ крезьгуръёс Шарль Азнавурлэн, Далидалэн, Морис Шевальелэн, Мирей Матьёлэн кырӟанъёссылы. Кылсярысь, Азнавурлы Мориа сю кызьлэсь трос крезьгуръёс аранжировать карем.

1962 аре Поль Мориалэн крезьгурез «Chariot» (гожтэмын Франк Пурселен и Раймонд Лефеврен ӵош) Европаысь «Евровидение» фестивальын гран-при басьтыны быгатӥз. 1963 аре нош со туж яратоно луиз США-ын улӥсьёс пӧлын (солы гожтэмын вал англи текст но сётэмын англи ним — «I will follow him»). 1965 аре Мориа кылдытэ «Сиосын шудон бадӟым орекстрзэ».

1967 аре Мориа нырысьсэ вуэ СССР-е, Мирей Матьёлэн аккомпаниаторез луыса. Вераны кулэ, ӵапак Мирей Матьёен ӵош ужаса Мориа асьлэстыз тужгес усто пластинкаоссэ гожтыса кельтыны быгатэм. Соос пӧлысь огез — «Viens ce soir» — пусъемын вал Франциысь эмъясьёслэн обществозылэн призэныз (Мориа шуоз на, солы та приз ваньмызлэсь мукет наградаослэсь дуногес луэ, пе). Матьёлэн но Мориалэн ӵош гожтэм альбомзы — «Mireille Matieu chante Paul Mauriat» — Франциын туж яратоно луэм.

1968 аре Мориалэн пластинкаез «L'amour est bleu» быдэс дуннеетӥ вӧлме, солэн тиражез 6 миллионлэсь экземпляр вылэм. Сое «зарни» шуиллям США-ын, Австриын, Канадаын, Аргентинаын, Мексикаын, Япониын, Бразилиын. Франциын со пластинка Бадӟым диск премиез утэм.

Мориа гастрольёсы ветлэм США-е, Японие (Япониын сое туж ӟеч тодо но ярато, ачиз нош Мориа аслэсьтыз нырысетӥ авторской альбомзэ— «Love sounds journey» (1976) — ӵапак Японилы сӥзем), озьы ик со ветлэм Австралие, Бразилие. Куинь пол со вуылӥз Россие: 1967 аре (Мирей Матьёен ӵош), 1978 аре (аслаз орекстреныз) но 2002 аре. Россиын али но туж ярато Мориалэсь крезьгуръёссэ: «Un home et une femme», «Parapluies de Cherbourg», «Toccata», «Manchester et Liverpool» но мукетъёссэ.

Поль Мориа кулӥз 2006 аре 3 ноябре Перпиньянын, Франциын.

Чӧлсконъёс

Европа кылъёсын:

Ӟуч кылын: