Бадретдинов, Ульфат Шайхутдинович:версиослэн висъяськемзы

Удмурт прозаик Ульфат Шайхутдинофич Бадретдинов 1957-ти арын 21-ти толшоре Башкортостанысь Бураево ёросысь Алтаево гуртын вордиськиз. Тямыс аръем школаез йылпумъяса, 1972-ти арын Можга педучилищее пыриз. Дышетскемъяз литературно-художественной кружоке ветлиз, чапак соку соин кивалтизы Григорий Данилов, Николай Байтеряков кылбурчи. Со вакытэ ик Ульфат Бадретдинов кылдытиз аслэсьтыз нырысети веросъёссэ. Соос печатламын вал «Советской Удмуртия», «Дась лу!» газетъёсын, «Молот» журналын. «Дась лу!» газетэн автор нырысьсэ тодматске 1969-ти арын, туж мыло-кыдо ужась юнкор луэ.▼

Училищеез йылпумъямез бере, ас гуртаз дышетись луыса ужаз. Армиысь бертыса, кык ар Большекачаковской шор-ёзо школаын тыршиз (Башкирия, Калтаси ёрос). Удмурт кун университетлэн заочной люкетаз дышетскыны пыриз.▼

1982-ти арын «Советской Удмуртия» газетэ ужаны кариськиз. 1990-1992-ти аръёсы «Инвожо» журналлэн валтись редакторезлэн воштисез вал. 1992-ти арын куарусён толэзьысен «Кизили» журналын кивоштись, 1995-ти арын посьтолэзьысен -валтись редактор. 2000-ти арысен Россиысь гожъяськисьёслэн огазеяськонзылэн (СП РФ) ёзчиез.▼

1988-ти арын поттиз веросъёсын нырысети бичетсэ – «Сяська сюлэмын но жужа». Татчы 14 верос пыремын, ваньзы соос вакчиесь, нылпилы чебер инкуазь дуннеез усьто, малы ке но дышето, визьнодало. «Кытын ти, фаэтъёс?» веросэз фантастика амалэн гожтэмын. Инсьорысь вуэм муртъёслэн улон мадёссы верамын, атомной кужымез урод малпанъёсын уже кутэмен сэрен планетазы пуштиз, вань улисьёсыз быризы. Автор геройёсыз пыр адямиос шоры возьматэ кадь. Юанъёс пуктэ: малы адями сётэм инкуазез уг утьы, малы тодон-валанэз кулэтэм оре кыске, кин кыл кутоз асьме понна? Асьсэос ик адямиос, пиналлы тае визьматыны турттэ кадь автор. Радиация, портэм щуге-леке сюронъёс мед милемыз палэнтозы!▼

Азьланяз эшшо потылизы на таче книгаосыз: «Мар луоз чуказе?» (Ижевск, 1991), «Мар со кадик?» (1994). «Мар луоз чуказе?» бичетын веросъёс но пьесаез печатласько. «Алтау усьтэ синъёссэ» маде: кык пичи пиос сэрттыны туртто гуртсылэсь нимзэ, пормемзэ, кылдэмзэ. Бигер кылысь со «горд гурезь» шуыса берыктиське. Егит лыдзисьлы Бадретдинов ас музъемзэ, дорзэ гажан мылкыд пычатэ, тодон-валан люканы дышетэ. Книгаоссэ Бадретдинов школае ветлись пичи но шоро-куспо арлыдо пиналъёслы сизе. Лыдзисез но азьтэм луыны кулэ овол – мед со тунсыкъяськоз котыр дуннеен, выжыосыныз, инкуазь радъяськемен. «Чагы посьтурын» веросын автор юмор амалэн шудэ. Серемес но, тунсыко но таче гожтосэн тодматскыны. «Кыче тон, Витя» пьесаез потэмын, озьы ик куд-ог азьлогес печатлам ужъёсыз («Велосипед» но мукет).▼

«Мар со кадик?» - пиналъёслы яркыт бадзым книга, А. Абрамовлэн суредъёсыныз чеберъямын. Татчы пыремын куд-ог печатлам веросъёс, озьы ик выльёсыз: «Дыртись Эльза», «Кужмо... чужкушманъёс», «Юн кор» но мукет. «Юный корреспондент» кылэн шудон пример вылын но адзиськом авторлэсь кылэз шодэмзэ, юморен гожъяськыны быгатэмзэ, дуннеез шулдыр синмын учкемзэ.▼

1993-ти арын «Кенеш» журналын «Чушъял вордиське веньёстэк» кузьверосэз (повестез) потэ.▼

1997-ти арын «Удмуртия» книгапоттонниын «Оте...» нимо пичи классъёсын дышетскись пиналъёслы сценкаосын но сценарийёсын книга дасямын. Суредъёссэ быдэстэ «Кизили» журналысь нылпиослэн яратоно суредасьсы В. Мустаев. Татын портэм сценкаос, нотаосын кырзанъёсын сценарийёс, Выль арез пумитаны «Дырез юбое уд думы» чебер кыз котырын шудон потизы. Со арын ик ас уксёеныз «Серекъян – адскисьтэм кужым» юморескаосын бичет печатла. Суредъёссэ дася тодмо суредась но архитектор К. Галиханов. Та книгаын озьы ик азьланьтиське удмурт гурт, семья, чошен тупаса улон тема, будон сюрес. 2000-ти арын «Инвожо» журналын «Шордин» автобиографи повестез потэ. Со книга потэмын нимаз зуч берыктэмен но (берыктиз А. Демьянов) – «Шордин, седцевина моя зоревая» (2004).▼

2002-ти арын У. Бадретдинов лыдзись дорозь «Пальпотон но малпаськон» бичетсэ вуттэ. Та – аспортэм бичет. Веросъёс, сценкаос но кылбуръёс малпаськыто, визез ужато. Та книгаез дышетскон пособие кадь но уже кутыны луэ. Кылсярысь, «Лобо луд зазегъёс», «Эдгарлэн часэз» веросъёс (соос загадкаос кадь, пумазы юан кылдэ). «Ульчаын» сценка ГИБДД катъёсты силы карыны дышетэ, сюрес вылын сак луыны косэ. «Эшъёсы-букваосы» сценка умой луоз азбукаез, гожъяськонэз дышетыны кутскись пиналъёслы, сое озьы ик дышетисьёс уже кутыны быгатозы. ▼

Берпумети потэм книгаез – «Чушъял вордиське веньёстэк», Ижевск, «Удмуртия», 2007 – повестьёсты, веросъёсты, пьесаосты люка. Та зок синмаськымон книгаын вужъёсыз но, выльёсыз ужъёс потизы. ▼

Писатель туннэ нуналэ но туж чырмыт гожъяське «Кизили», «Инвожо», «Кенеш» журналъёс понна. Куд-ог произведениосыз зуч, коми, коми-пермяк, башкир, бигер кылъёсы берыктэмын, коняез ке «Мурзилка», «Миша», «Вилы» журналъёсын печатламын, учебникъёсы но пособиосы пыртэмын.▼