Вавож ёрос:версиослэн висъяськемзы

 

Ёрослэн огъя площадез - 167 сюрс 899 гектар. Ёрослэн уйпалыз интыяськемын Центрально-Удмуртской низменностьын, лымшор палыз - Можгинской возвышенностьын. Ёросэтӥ бызё Вало, Инга, Ува, Кылт шуръёс, трос тыметъёсыз но тыосыз. Тужгес бадӟымез тымет Брызгаловоын - 134 гектар музъем вылын.

 

 

Вашкала дауръёсы та музъемъёс вылын улӥллям Юсь, Можга, Докья, Пельга, Котъя, Уча, Монья, Бия выжыос. Вавожъёс сярысь нырысьсэ вераськонъёс вӧлмиллям 1716-тӥ арын.

1929-тӥ арын уездъёс быризы, нош волостной районъёс интые кылдӥзы административной ёросъёс. Вавож ёрос кылдӥз 15-тӥ июле 1929-тӥ арын. Соку отчы пыризы азьвыл Малмыж уездысь 6 волостьёс: Вавожской, Водзимоньинской, Волипельгинской, Большеучинской, Ува-Туклинской, Тыловыл-Пельгинской. Ваньмыз-ӧвӧлэз 20 сельсоветэз вал.

 

 

2009-тӥ арын 1-тӥ январльы ёросын 17 сюрс 314 улӥсез вал. 2010-тӥ арын - 18 сюрс 456 адями. Улӥсьёсызъя республикаысь ёросъёс пӧлын 17-тӥ инты басьтэ. 2002-тӥ арын ортчытэм переписья [[Вавожлэн|Вавож]]лэн музъем вылаз уло удмуртъёс - 56,6%, ӟучъёс - 39,4%, татаръёс - 1%, музон калыкъёс - 3%. Озьы Вавож ёрос пыре шаерысьтымы 16 тужгес удмурто ёросъёс пӧлы.

 

 

Ёрослэн вань аслаз Уставез, муниципал кылдытэтъёсыз.

Вавож ёрослэн кунпусаз куинь символэз вань: чагыр буёл вылын адско нюлэс но ю шеп. Угось ёрослэн экономикаез быдэак герӟаськемын гурт удысэн но нюлэс хозяйствоен. Нош чагыр буёл возьматэ ошмесъёсын, шуръёсын узыр музъемзэс.

 

Вавож ёросын ваньмыз-ӧвӧлэз 35 дышетон учреждение: 17 школа, 16 нылпи сад, ватсаса тодон-валан сётонъя 3 центр. Татын визь песьтэрзэ будэтэ 3 сюрслэсь трос пианл, соосын ужало сюрслэсь уно дышетӥсьёс. 2007-тӥ арын Вавож черкогуртысь школа вормисе потӥз инновациослы сӥзем программаосты улонэ пыӵатонъя конкурсын. 2006-2009-тӥ аръёсы 8 дышетӥсь «Россиысь дано дышетӥсь» конкурсын лауреат луиз.

 

Ёросын дышетон удыслэн кутсконэз герӟаськемын 1842-тӥ арен. Соку Вавожын усьтӥськиз церковно-приходской школа. Ӵапак татын ик тодон-валанзэ муромытӥз тодосчи Кузебай Герд, авиациысь маршал [[Фёдор Фалалеев|Фёдор Фалалеев]].

 

 

2008-тӥ арын Вавожысь ёрос больница пусйиз усьтӥськемез дырысен 140 ар тырмонэз. Татын вань стационар, 4 амбулатория, 19 фельдшерско-акушерской пункт. Та эмъян юртъёсын ужа 42 врач, 172 эмсузэр.

 

 

Гурт удыс - валтӥсь инты басьтэ ёрослэн экономикаяз. Берло аръёсы, мукет ёросъёсын ӵошатыса, та удысъя соос азьпал радын мыно. Ёросын ваньмыз-ӧвӧлэз 12 кооператив, отын тырше 2 сюрслэсь ятыр адями. Усто тыршо [[Мичурин нимо,|Мичурин нимо,]] [[«Колос»|«Колос»]], [[«Удмуртия»|«Удмуртия»]], [[«Луч»|«Луч»]], [[«Зарни Луд»|«Зарни Луд»]], [[«Жуе-Можга»|«Жуе-Можга»]] эштосъёс. 50-лэсь трос дояркаос котькуд скаллы быдэ кыско 6 сюрс литрлэсь уно йӧл.

Туннэ ёросын ужа промышленностья кӧня ке огазеяськон: [[«Какможлес»|«Какможлес»]], [[«Вавожлес»|«Вавожлес»]], [[«Нюрдор-Котья»|«Нюрдор-Котья»]], [[«Сайдинг»|«Сайдинг»]]. Одӥгъёсыз нюлэсэн выро ке, мукетъёсыз тыршо гыбед поттонын. Вавож палъёсы чагыр эстӥськон кысконъя но ужъёс огсыр мыно. Берло кык ар куспын 130 километр газопровод нуйтэмын.

 

 

Ёросын тужгес бадӟым саклык висъяло нылпи спортлы. Та ласянь ӟеч тырше [[Вавож ДЮСШ|Вавож ДЮСШ]]. Отчы ветлэмъёс тросэз спортъя мастеръёс, эрико нюръяськонъя [[Приволжск федерал округ|Приволжск федерал округ]]ысь чемпионъёс луо ини: Тимур Аллакулов, Владимир Аллакулов, Виктория Кочнева. С. Каргашин тренерлэн дышетскисьёсыз - Николай Лебедев, Татьяна Протопопова, Екатерина Лебедева, Андрей Голубьев - шаерысьтымы куасчиослэн сборноязы пыро. Денис Кокорин, Анна Евстафьева, Виталий Коротаев - Иван но Никита Рябовъёс, Мария Чуб - капчи атлетикая кужмо усточиос. Арлы быдэ школаын дышетскисьёслы А. Мезринлы сӥзем спартакиадаос ортчыло. Та сяна, егитъёс мыло-кыдо пырисько [[Тол но Гурт шудонъёсы|Тол но Гурт шудонъёс]]ы. Кылсярысь, 2009-тӥ арын спортсменъёс Тол но Гужем президент шудонъёсын 3-тӥ инты басьтӥзы.

 

== Линкъёс ==