Парин, Василий Николаевич

Василий Николаевич Парин (1877 - 1947) – хирург, медицина наукаосъя доктор, РСФСР-ысь наука удысысь дано ужась.

Улон но ужан сюресэз

Вордӥськиз Вятской губерниысь Малмыж уездысь Сюмси черко гуртын (та черко гурт али Удмурт Республикае пыре). Школазэ но Малмыжысь кар училищеез йылпумъямез бере В.Н. Парин дышетске Кузонысь дышетӥсьёслы институтын (шор ёзо педагогической дышетсконни). 1897-тӥ арын сое йылпумъя но дышетӥсь луыса ньыль ар ужа. 1901-тӥ арын Кузонысь университетэ пыре но отличиен йылпумъя сое.

Университет бере ик ужаны кутске В.И. Разумовский профессорлэн кивалтэмез улсын факультетской хирургической клиникаын. 1912-тӥ арын медицинской наукаосъя доктор диссертация уте но Европае научной командировкаен вуылэ.

Нырысетӥ мировой война дырья В.Н. Парин Горд Киросысь консультант луыса армиын ужа но ожгар госпитальёсты кылдытонэ трос кужым сётэ. 1921-тӥ арын Пермьысь госпитальной хирургия кафедралэн кивалтӥсез луыса тырше. Бӧрысь солэн вань улонэз (26 ар) Пермьысь эм академиен герӟаськиз ини.

Кык ар улӥз Иж карын но: 1933-1935-тӥ аръёсы Ижысь медициная институтэз кылдытыны юрттӥз. Ужаз академиысь кивалтӥсезлэн научно-учебной ужъя кивоштӥсез луыса.

Быдӟым Отечественной ож дырья госпитальной хирургической клиникаен кивалтӥз, валтӥсь хирург луыса тыршиз Пермь областьысь эвакуационной госпитальёсын. Трос кужымзэ сётӥз госпиталъёслэсь ужзэ умоятон понна.

В.Н. Парин – пӧртэм удысъёсысь хирург, тодосчи, кудӥз вирсэр хирургие, травматологие, пластической, ымныр хиругие трос выльзэ пыртӥз. Аслэсьтыз тодос школазэ кылдытӥз. 10 доктор но 10 медицинской наукаосъя кандидатъёсты дасяз. 18 дышетскисьёсыз кафедраосын кивалтӥзы. Ог 400 пала научной статьяослэн авторез луэ.

Василий Николаевич общественной улонэн но герӟаськемын вал: медициная научной общестолэн тӧроез, кар кенешлэн депутатэз, хирургъёслэн вань Союзысь обществолэн членэз, «Хирургия» но «Вестник хирургии» журналъёсысь редколлегиослэн членэз луыса тыршиз. «пермский медицинский журналэз» кылдытӥз но валтӥсь редактор луыса трос дыр ӵоже ужаз.

Горд Кизили орденэн но «За победу над Германией», «За доблестный труд в Великой Отечественной войне1941-1945 гг.» медальёсын пусъемын.