Снусмумрик

Снусмумрик (швед. Snusmumriken, фин. Nuuskamuikkunen) - Туве Янссонлэн Мумми-трольёс сярысь книгаосысьтыз огез персонаж. 

Снусмумрик - Муми-трольлэн матысь эшез. Котькуд гужемзэ Муми-нёжалын ортчытэ, нош сӥзьыл мукет шаеръёсы кошкылэ. Котькуд пӧйшурез но тылобурдоосты нимзыя тодэ. Яратэ пӧртэм учыръёсы сюрылыны, огназ улыны, чильым кыскыны но ымдур арганэн шудыны. Уг яраты маке карыны лэзисьтэм пусъёсты но караулчиосты. Улэ палаткаын, кудзэ котьку сьӧраз нулдэ. 

Снусмумриклэн кылдэмез

Снусмумриклэн прототипез - финн журналист но политик Атос Казимир Виртанен (1906-1979), Туве Янссонлэн эшез но карт луонэз (но сюан дорозь кусыпъёс ӧз возиське). Снусмумриклэн вож изьыез ӵапак сыӵе ик, кыӵе нулдэ вал Виртанен. Тросэз Туве Янссонлэн лыдӟисьёсыз огымысь кадь верало, та персонаж тужгес но удалтэмез шуыса. Снусмумрик - эрико адями, гань-гань мурт, кудӥз уксё вылын возиськись дуннелэсь палэнскиз. Ачиз Янссон интервьюосаз шуылӥз: "Эрико луыны но улыны отын, кытын потэ - тужгес но бадӟым шуд". 

Снусмумрик Муми-трольёс сярысь книгаосын

Снусмумрик - тодмо огназ мынӥсь-ветлӥсь. Янссон сое котырес ымнырын, бадӟым синъёсын адямиен возьматэ. Солэн вылаз - вож зорлэсь утись плащ но тылыен вож шляпа. Нырысьсэ та персонаж "Муми-троль но быжокизили" книгаын пумиське: Муми-троль но Снифф Снусмумрикен гурезьёсы мыныкузы тодматско. Нош "Муми-атайлэн ачиз сярысь гожтэмъёсыз" книгаысь тодмо луэ, Снусмумриклэн анай-атаез - со Мюмла-анай но Юскаре. Атаез кадь ик Снусмумрик трос уг вераськы, мыныкуз-ветлыкуз сое адӟытэк но кылёд, угось со туж шыпыт ветлэ но котыр улослэсь уг висъяськы. Но со дыре ик Снусмумрик ассэ воземеныз паймытыны быгатэ, кылсярысь, паркез чакласесь кышкатыса (ас улоназ со караулчиосты гинэ адӟемпотостэм каре). Снусмумриклэн туж вожез потэ, куке со "Гуждор вылтӥ ветлыны уг яра" выллем гожтэмъёсты адӟе. Улоназ со трос кытӥ ветлӥз ни бере, тодэ, кызьы кышкыт учыръёсысь потыны. Огпол со арбуз лушкамез понна пытсэт сьӧры сюриз, но, музъем ултӥ сюрес лёгыса, пегӟыны быгатӥз. Снифен ӵошатоно ке, Снусмумрик арбериос борды уг думиськы, солэн тужгес кулэ арбериосыз пӧлы пыро: чильым, ымдур-арган, пуйы, палатка, вож зорлэсь утись плащ, вуж шляпа, вуж штань. Книгаысь книгае выжонъя, адӟиськом, Снусмумрик ас пушказ вые, огназгес кариськыны выре, лекгес но вераськисьтэмгес луэ ("Шуркынмон пумын" книгаын но "Тулыс кырӟан" веросын). Озьы ке но со котьку Муми-нёжалэ берта, пушдуннеяз гань-гань мед луоз шуыса. 

Тунсыко книгаысь книгае чакланы та персонажлэсь воштӥськемзэ. 1946-тӥ аръёсы потэм книгаосын Снусмумрик - отӥ-татӥ ветлӥсь кылбурчи, кудӥз котькыӵе мугъя кылбур гожтыны дась; ӵаш поттӥсь, ассэ яратӥсь персонаж, кудӥз йырин мукетъёсызлэн шуг-секытъёссы кылдо. Берло потэм книгаосаз Янссон та персонажзэ копак воштэ но вераськисьтэм дуннеез котыръясь муртлы пӧрмытэ. 

Ватсэт

• Тува Янссон: Мумь-дядяй подвигез. (Bravader Muminpappan), Ярвинивать Лайла берыктон. WSOY, 1994. ИСБНА 951-0-19578-2.