Удмурт дунне (газет)
«Удмурт дунне» — Удмурт Республикаын потӥсь югдурез но политикаез возьматӥсь газет. Потэ удмурт кылын. Учредительёсыз: Удмурт Республикаысь Кун Кенеш но Правительство.
Потыны кутскиз 1915-тӥ арын Вятской губерниысь губернаторез Андрей Чернявский лэземъя потӥз нырысетӥез удмурт газет — «Войнаысь ивор». Ӵапак со газет потэм дырысен ик кутскиз «Удмурт дуннелэн» историез.
Аслаз улонэз ӵоже газет сизьым пол нимзэ вошъяз:
- 1915-тӥ ар — «Войнаысь ивор»
- 1917-тӥ ар — «Удморт»
- 1918-тӥ ар — «Виль синь»
- 1930-тӥ ар — «Гудыри»
- 1943-тӥ ар — «Советской Удмуртия»
- 1992-тӥ ар — «Удмурт дунне»
Али «Удмурт дунне» газет потэ А3 форматэн арняяз 3 пол. Шергес пото «Берекет» но «Герд» («Удмурт кенеш» огазеяськонлэн газетэз) нимо ватсанъёс. Газетлэн огъя тиражез — 10 сюрс пала. Газет вӧлме подпиская Удмуртие, Татарстанэ, Башкортостанэ.
Редакциын 35 мурт ужа. Со пӧлысь 18-эз — творческой ужасьёс: журналистъёс но дизайнеръёс. Газетын ужало тодмо журналистъёс, писательёс но кылбурчиос: Алексей Шкляев, Татьяна Чернова, Лия Малых, Зинаида Рябинина, Любовь Тихонова, Елена Миннигараева… Бадӟым оскон сёто егит гожъяськисьёс.
90 ар ӵоже воштӥськиз 25 валтӥсь редактор. Удмурт газетлэн нырысетӥ редакторъёсыз луизы Павел Глезденёв, Василий Крылов (1915—1917), 1918-тӥ арын газетэз валтӥз Константин Яковлев, собере — Трофим Борисов (1918—1921). Валтӥсь редакторын 20 ар ӵоже ужаз (1967—1987 Василий Михайлович Михайлов. 1994-тӥ-2010-тӥ аръёсы «Удмурт дуннеен» кивалтӥз Алексей Петрович Шкляев. 2010-тӥ арысен валтӥсь редакторлэн удысэз нырысьсэ оскемын нылкышнолы — Зинаида Рябининалы.
Газет гожъя Удмуртиысь но Россиысь югдур, политика, культура, дышетон, гурт удыс, национальной ужпумъёс сярысь. Бадӟым саклык висъя шаерез гажан мылкыд пыӵатонлы, артэ улӥсь калыкъёсын тупаса улонлы, аслэсьтыд кылдэ но культурадэ утёнлы-азинтонлы. Арнялы быдэ потэ «Шӧкыч» — сатираен но юморен бам. Нылкышноос котьку возьмало «Наталь» бамез. Со сяна толэзьлы быдэ пото: «Тазалык», «Кузё», «Егитъёс»… Редакция мыло-кыдо ужа авторъёсын.
«Удмурт дунне» — шаерысьтымы валтӥсез удмурт газет. Журналистъёс арлы быдэ вормыло творческой конкурсъёсын. 2006-тӥ арын коллективлы сётэмын Трокай Борисовлэн премиез. 2004-тӥ арын шаерамы ортчизы «Удмурт дунне» газетлэн призэз понна куасэн бызьылонъя 50-тӥ ӵошатсконъёс. (Ортчыло 1952-тӥ арысен).
«Удмурт дунне» газетын ужасьёс ӟеч кусыпъёс возё финн-угор дуннеысь эшъёсынызы: гожъяськисьёс ог-огзы доры дышетскыны ветло, иворъёс дасяло. «Удмурт дуннеослэн» кичӧлтэменызы шаерамы финн-угор журналистъёслэн пумиськонъёссы-кенешъёссы радъяськыло. Туннэ, тиражъёс кулэсмон вакытэ, Россиысь финн-угор газетъёс пӧлын «Удмурт дуннелэн» лыдыз тужгес йӧноез луэ.