Сыропятов, Петр Нестерович

Петр Нестерович Сыропятов — Удмуртиысь гурт удысын дано ужась, ужысь но Быдӟым ожысь ветеран, Ленин но «Знак Почёта» орденъёслэн кавалерзы, быгатӥсь радъясь но кивалтӥсь.

П. Н. Сыропятов вордскиз 1926-тӥ арын 6-тӥ пӧсьтолэзе Улын Сырьезь гуртын трос нылпиё семьяын. Дышетсконзэ йылпумъямез бере сое армие басьтӥллям. Службаезлэн кутсконэз Быдӟым ож аръёсын тупаз. Петр Нестерович «За Победу над Германией» медален пусъемын. 1948-тӥ арын партие пыре. Со дырысен «выль улонэз» кутске. 1962-тӥ арын сое Сырьезьысь Ильич нимо колхозэ кивалтӥсе пукто, отын со 24 ар ӵоже ужа. Кивалтон вакытаз пуктэмын вал выль гидъёс, 2 квартираё коркаос, школа, нылпи сад, кык этажъем 18 квартираё корка, администрацилэн юртэз. Бусыосазы со вакытэ, ю-нянь сяна, трос картофка но етӥн будэтӥзы. Азинсконъёссы понна Ильич нимо колхоз пӧртэм аръёсы Удмурт АССР-ысь гурт удысъя министерствоен 6 пол Горд знамяен пусъемын.