Сӥзьыл академия

Сӥзьыл академия - Германиысь Роберт Бош нимо фондлэн одӥгез бадӟым проектэз, со радъяське котькуд сӥзьыл пӧртэм каръёсын. Луэ на «Тулыс академия»

Немецъёс берпуметӥ аръёсы тужгес но сюлмаськыны кутскизы вордскем кылзэс мукет кунъёсысь пӧртэм калыкъёс пӧлы пыӵатон понна. Озьы кылдӥзы уно проектъёс: кунсьӧр студентъёслы Германиын радъяськись немец кылъя курсъёс, пӧртэм магистр программаос, школаысь дышетскисьёслы экскурсиос…

«Сӥзьыл академия» нимо семинаръёсын немец кылъя егит дышетӥсьёс кунсьӧр кылъёсыз дышетонъя методикаен матысьгес тодматско (вераны кулэ, Роберт Бош нимо фондлэн лекторъёсыз чик педагогической образованитэк дышетыны быгато), выль дидактической материалъёсыз учко, ог-огенызы тодматско но шуг-секытъёссэс сэртто-пертчо.

Ижкарын таӵе семинар 2012-тӥ арын 19-24-тӥ шуркынмонэ радъяськиз.