Удмуртиысь экономика

Удмуртиысь экономика — Россиысь улосъёс пӧлысь 34-тӥ экономика (ВВП-лэн объёмезъя лыдъяса). 2016-тӥ арын Удмуртиысь ВВП-лэн быдӟалаез 540,1 миллиард манет вал, адямилы быдэ — 356 сюрс манет.

История

Асьме эралэн 1-тӥ сюрсарезлэсь азьло туала Удмуртилэн территориез Ватка шур котыре интыяськем Ватка музъемлэн составаз пыре вал. Солэн пыр-выжы улӥсьёсызлэн — удмуртъёслэн, поръёслэн, комиослэн — валтӥсь ужъёссы вылэм огшоры музъем ужан, пӧйшуран, чорыгаллян но чечы кыскон.

Асьме эралэн 2-тӥ сюрсарезлэн кутсконаз шаерамы улэмъёслэн хозяйствозылы инъет луиз валэн гырыса музъем ужан. Будэтӥськылӥзы вазь, йыды, сезьы, валэс ӟег, небыт но карликовой чабей, тари, кӧжы, сяртчы, пыш, яснык. Удалтонэз сюрлоосын но кусоосын октылӥзы-калтылӥзы, октэм тысь изылӥзы, кӧос киын бергатыса. Гыроно мулэн быдӟалаез ялан паськыталляз вӧльылэмен, куке нюлэсэз кораса яке кенжытыса быдто, но выль интыын кизиське тысь, кудӥз пу усыен усыяське.

Озьы ик вордылӥзы сюро таза пудоез, валъёсыз, гурт кечъёсыз, ыжъёсыз, парсьёсыз. Нош пудо вордон бадӟым роль ӧз шуды, малы ке шуоно сӥльлы кулэяськон пӧйшуранэн тырмытскылӥз.