Астрофизика — ин телоосын, системаосазы но космосын луылӥсь физической явлениосты но химической процессъёсты дышетӥсь астрономилэн люкетэз. Астрофизикае пыртӥсько Югытдуннеысь физической явлениос сярысь информациез поттон амалъёс бордын ужан, та информациез (астрономической эскерылонэнгес) люкан, сое наукаен обработать карон но теориен огъян. Теоретической астрофизика, чакласькись астрофизикаен люкам фактъёсыз огъяку но валэктыку, уже кутэ законъёссэ но амалъёссэ теоретической физикалэсь. Чакласькись астрофизикалэн амалъёсызлэсь герӟоссэс практической астрофизика ӵемысь шуо.

Ультрабусӥр тылсиосын адӟиськись Андромеда галактика
Уйпал Кавказысь РТФ-32 радиотелескоп

Ас историяз чакласькись астрофизикалэн нимаз дисциплинаослы люкиськемез кык тодметъя радъяськиз: эскерон амалъёсъя но эскероно объектъёсъя. Пӧртэм пумо амалъёслы сӥземын сыӵе дисциплинаос: астрофотометрия, астроспектроскопия, астроспектрофотометрия, астрополяриметрия, астроколориметрия, рентген астрономия, гамма-астрономия но мукетъёсыз. Эскероно объектъя висъям дисциплинаослэн примеръёссы луо: Шундылэн физикаез, планетаослэн физиказы, буслыкъёслэн физиказы, кизилиослэн физиказы но мукетъёсыз.