Булычёв, Михаил Никандрович

Булычев, Михаил Никандрович» бамысь кудланьтэмын)

Михаил Никандрович Булычёв (1902—1959) — удмурт кылтодосчи.

Михаил Никандрович Булычёв
Вордӥськем нуналыз: 20-тӥ куартолэзе 1902(1902-05-20)
Вордӥськем интыез: Бабашур, Малмыж утем, Ватка губерния
Кулон нуналыз: 1959(1959)

Улос сюресэз Тупатыны

Михаил Булычев вордскемын 1902-тӥ арын 20-тӥ куартолэзе (озьы гожтэмын солэн документаз) Вятка губернилэн Малмыж уездэзлэн Узи ёросысьтыз Бабашур гуртын (али со Сьӧлта ёросын) шоро-куспо семьяын. Нош зэмзэ ке, шуг вераны кызьы со вордскемын вал. Аслаз киыныз со витетӥ куартолэзе шуыса гожтэм, нош шайгуэзлэн кирос вылаз 24-тӥ куартолэзь пусъемын. Вуоно тодосчилэн быдэ вуон но ужан сюресэз капчи вылымтэ. Атаез Никандр тямыс нылпи будэтэм. Нырысетӥ кузпалызлэсь вордскиллям кык ныл но пи, кыкетӥезлэсь — кык ныл но куинь пи. Атаез кулыку, Михаиллы куинь арес гинэ вылэм. Соин сэрен со Иван нимо бадӟым агаез дорын быдэсмем, дышетскыны Вуж Ӟатчалась вылӥ кутскон школае ветлэм. Отын куинь классэз йылпумъям.

1919-тӥ арын Михаил 30-тӥ пыӵал-пулемёт дивизионын ныль толэзьлэсь кемагес подводчик вылэм но Эгра, Сьӧлта, Валамаз, Уни палъёсы вуылэм, 1921-тӥ арын Сьӧлталась калыкез дышетон люкетлэн подъясез (делопроизводителез) луыса ужам. Собере 1924-тӥ арозь Балигурт, Пали-Лыстэм но Кезвыр гуртъёсысь пиналъёсты дышетэм. 1924-1926-тӥ аръёсы Михаил Булычев Кузонын Горд Армиын ужам. Со дыре ик бадӟымъёслы школаын рабфаклэн программаезъя дышетскем. Собере Кузонысь Ӵукпал-Педагоги институтэ дышетскыны пырем. Кык ар ортчыса, отысь студентъёсты Ленинградысь Ленин нимо педагоги институтэ выжтӥллям. Сое йылпумъямез бере, 1930-1933-тӥ аръёсы, Выль Мултан педагоги техникумын нырысь дышетӥсь, собере завуч но директор луыса ужам. 1933-1934-тӥ аръёсы сое Удмурт пединститутэ ужаны басьтӥллям. 1934-1937-тӥ аръёсы Мускоысь Кыл но гожъяськет шор институтлэн аспирантураяз дышетскем ни.