Юлия

Улын Юри гурт (Нижние Юри)

Улын Юри гуртлэн аслаз кылдэм сюресэз. Солэн кылдэмез сярысь веразы ини трос малпанъёс. Одӥгез тужгес но вӧлмемез легенда таӵе. Улэм-вылэм одӥг воргорон. Вылэм солэн куинь пиосыз. Улӥллям соос ӵошен, ог-огзэс яратыса но гажаса. Но тани кулон дырыз но вуэм атайзылэн. Кулон азяз воргорон кутэм кияз куинь пӧсь колды нянь но верам пиосызлы: "Тӥ быдэ вуэм яратоно пиосы мынам. Вуиз ни дыр асьтэлэсь улондэс лэсьтыны. Лэзисько тӥледыз бадӟым, паськыт, эрико дуннее. Котькуддылы сётӥсько та пӧсь колды нянез. Кытын сӥяз няньды, отын ик улыны интыяськоды, семья кылдытоды. Шудо сюрес тӥледлы". Сыӵе кылъёсын лэзиз воргорон пиоссэ но кулӥз. Озьы пиос потӥзы адӟыны паськыт дуннеез. Бадӟымез пизылэн нянез сӥям Вылын Юри гуртын. Отчы ик со интыяськем. Шоретӥезлэн сӥям улӥынгес, нимаськем со Шорын Юри. Нош самой покчиезлэн колдыез сӥям ваньмызлэсь улӥын - Улын Юриын/Улын Юри. Озьы пиос интыяськиллям та интыосы, пуктӥллям корка, семья кылдытӥллям.Ог-огзы доры куное ветлӥллям. Али но та куинь гуртъёс валче кенешыса, ог-огзэс гажаса уло на.

Трофим (Трокай) Кузьмич Борисов — публицист, филолог, этнограф. Вордӥськиз 19-тӥ шуркынмонэ (1-тӥ толсуре) 1891-тӥ арын Алнаш ёросысь Кизекгуртын. Дышетскиз гуртысьтыз земской школаын. Тодон-валанзэ муромытӥз Алнаш черкогуртысь 2 классъем школаын, Елабугаысь но Казаньысь техникая училищеосын. 1912-тӥ-1913-тӥ аръёсы пыре Санкт-Петербургысь историяя но филологияя факультетэ. 1914-тӥ-1916-тӥ аръёсы тодон-валанзэ паськытатэ Казань университетысь медициная факультетын.

1917-тӥ арын дышетсконзэ йылпумъямез бере Борисовез келязы Минской фронтэ. Отын госпитальын эмъясь луыса ужаз, дурбасьтӥз большевикъёс пала. Мыло-кыдо пыриське совето властез кылдытонэ . 1918-тӥ арын Украинаын ожмаськемез бере, бертӥ дораз. Татын сое бырйизы Елабуга уездлэн исполкомысьтыз депутатъёслэн кенешсылэн тӧрое. Елабугаын большевикъёслэсь ячейказэс кылдытэ.

31-тӥ коньывуонэ 1918-тӥ арын Трофим Борисовлэн кивалтэмез улсын «Гудыри» газетлэн нырысетӥ номерез потӥз. Нош 1919-тӥ арын Сарапул городын радъяз Вань удмурт крестьянъёслэсь съездзэс. Отысен ик калык сое бырйиз комиссаре — Центральной комиссариатысь удмуртъёсын герӟаськем ужпумъёсты сэрттӥсе-пертчисе. Но яркыт малпанъёссэ быдэстыса ӧз вутты — 1922-тӥ арын сепаратизм мылкыдъёсыз понна сое янгыше уськытӥзы. 1923-тӥ арын Борисовез партиысь но, ужысьтыз но уллязы. 1928-тӥ арын Трофим Кузьмичез вить арлы пытсэт сьӧры — Сыктывкаре — келязы.

1931-тӥ арын кошкиз Москвае, дышетскыны пыриз Броннер нимо институтлэн аспирантураяз. Со дыре ик ужаз Москва котырысь пичи городын эмъясь-венеролог луыса. 14-тӥ толщоре Т. Борисовез янгыше уськытӥзы «СОФИН» ужъя. 1936-тӥ-1938-тӥ аръёсы Иркутск палъёсын пытсэт сьӧрын пукиз. 1940-тӥ арын со нош арест улэ шеде. Трофим Борисовез шонере поттӥзы 20-тӥ куарусенэ 1989-тӥ арын гинэ. Та ласянь авторлы бадӟым юрттэт сётӥзы, шуыны луоз, удмурт профессор К. Куликов но Калмыкиысь калык поэт Д. Кугультинов.

Пусъёно: Санкт-Петербургын дышетскыкуз, Борисов мыло-кыдо тунсыкъяськиз этнографиен, лингвистикаен, фольклорен. Гожтэт пыр кусып возьылӥз тодмо ӟуч тодосчиен Д. К. Зеленинэн. «Гудыри» газетын редактор луэмез бере, басьтӥськиз литература удыс борды. Гожъяз кылбуръёс, листовкаос, этнографилы сӥзем очеркъёс, брошюраос. Потӥзы таӵе ужъёсыз: «Грамматика вотского языка» (1921), 1929-тӥ арын «Песни южных вотяков», «Удмурт кыллюкам» (1932-тӥ арын) книгаоссэ. Та сяна, дасяз «Удмурт стихотвореняос», «Удморт кылбуръёс» (1919) антологиоссэ. 1921-тӥ арын, Кузебай Гердэн валче кариськыса, радъязы Удмурт писательёслэсь нырысетӥ съездзэс. Т. Борисов трос кужымзэ но визьзэ сётӥз на «Кенеш» журналэз кылдытонлы но.

Улонысь кошкиз 4-тӥ июне 1943-тӥ арын Актюбинск лагерьын (Узбекистанысь Чимкент город).