Лымшор удмуртъёслэн дӥськутсы

Лымшор удмуртъёслэсь дӥськутсэс нулло вал туала Удмурт Элькунысь Алнаш, Дэри, Грах, Пичи Пурга, Кияса, Можга, Кизнер ёросъёсын, Татарстанысь Агрыз, Бавлы, Кукмор, Менделеевск, Балтаси, Мамадыш ёросъёсын, Марий Элысь Мари-Турек ёросын, Башкортостанысь Ермекеево, Татышлы, Янаул, Калтасы, Бураево, Кушнаренково, Балтач ёросъёсын, Киров улосвылысь Малмыж ёросын но Пермь музъем вылысь Куеда ёросын улӥсьёс.

Та удмуртъёслэн дӥськутазы огкадез вань: нылкышно дэрем (тыбырыз но азьыз) одӥг кузь кесэглэсь вуриське. Сӧзултӥз паськытатон понна урдэсъёсыз кырыж вандэм сеп пукто. Саесъёсыз мугор бордаз мырк вурисько, куд-ог дыръя пельпумтӥз ӧжытак шымыръяло вылэм. Кунул ӝыбыез куинь сэрего но, ньыль сэрего но луэ. Сиресэз огшоры, мылазь кыретэз пырак вандэмын, вылтӥз сирес ултӥзгес басма вандэтлэсь муресазь вуремын. Сӧзулыз но кильымъёс вискытӥ пужыятыса куэм 5 см пасьта дэра вуро. Куэмын ӝуткаса яке бичаса, пӧртэм буё ыж гон но вата шортэз уже кутыса, инъетэз мертчан шортлэсь.

Азькышетъёссы (айшет) ӝужыт но лапег гадё, кильымо яке кильымамтэ. Воштӥськон азькышетъёссэс вуро вал пужыятыса куэм дэралэсь.

Лымшор удмуртъёс XIX даурлэн пумаз – XX даурлэн кутсконаз нулло на вал туйлэсь азвесь коньдонъёсын чеберъяса лэсьтэм конус выллем ӝужыт изьыян айшон*, со вылтӥ – пужъятэм сюлык*.

Тани кызьы суреда айшонэз XVIII даурысь этнограф-путешественник Паллас: «Кусок бересты в пядень вышиною сгибают по мере головы в полуцилиндр, назади мягким куском корки связываются, а внутри деревянной дужкой и поперечным деревцом укрепляются и совокупно держатся; на верхнем краю нашита другая – двойная, сзади к поперечнику деревцом укреплённая, четырёхугольная, почти в пядень высокая берёзовая корка, и так утверждённая, что несколько вперёд выдаётся и по обеим сторонам назад пригнута. Сию верхнюю корку прикрывают обыкновенно красным, а в нижнюю иным сукном, а сверх того укладывали последнюю сплошь копейками и оловянными бляшками. Сей в две пядины вышины головной убор «айшун» пришитым назад ремнём на голове укрепляют и, несколько выдав её вперёд, наподобие гренадёрской шапки носят. Наибольшую важность придают сему головному их украшению в локоть величиною четырёхугольное сукно, которое по краям и по углам красными и синими кофейными нитками вышито, а в середине в четырёхугольный узор украшено и вокруг в палец шириною полосками синими, красными и белыми шнурками обложено бывает. Сие на верхнем краю коры прикрепляется так, чтобы один угол над верхней берестою вниз висел и её покрывал, и чтобы серебряными или оловянными бляшками укладенное место было видно. Два угла покрывают всю сторону убора и голову до плеч, а четвертый висит назаде по спине под сим головным убором». (Учке: Белицер В.Н. Народная одежда удмуртов. М., 1951. 61-62-тӥ бамъёс)

Чалмазылэсь* (диал.:дьыркышетлэсь) пумъёссэ пужыятыса куэм яке пужъятэм дэралэсь лэсьто вылэм; йыркерттэтсы яке уко шортэн пужыятэмын, яке уко тасмаен чебермамын, яке векчи азвесь коньдонэн бырттылэмын.

Лымшор удмурт нылкышноослэн туж тунсыкоесь луо йырси, чырты, гадь но суй чеберманъёссы, тужгес но паймыто пельугыоссы, поскесъёссы, зундэсъёссы*, йырси быртэтъёссы. Валтӥсь инты татын басьто вылэм «…азвесь коньдон – ӟуч коньдон (эксэй монетаос но векчи азвесь) но кунгожсьӧр арбериос (бирдыос-инӟыос*, корт пачкес котыретъёс, ошетъёс, шильыриос). Дуно азвесь коньдонъёслэсь тупатъям чеберманъёссэс узыр семьяосын туж кема утьыса возьылӥзы – анаез нылызлы, соиз аслаз нылызлы, таиз нош аслазэзлы кузьмаса кельтылӥзы. Начаргес улӥсьёсыз азвесь коньдон интые чеберманъёс лэсьтыны уже куто вылэм узвесьлэсь но туйлэсь тупатэм котыретъёсты» (Белицер В.Н., 71-тӥ бам).

Пӧртэм интыосын улӥсь лымшор удмуртъёслэн дӥськутсы ог-огзылэсь шӧдскымон висъясько. Сое лыдэ басьтыса, удмуртъёслэсь дӥськутсэс таӵе ньыль пӧртэмлыкъёслы люки: чын (собственно) лымшор (тапалъёс), Ватка, Кам сьӧр (тупалъёс) но бавлы пӧртэмлыкъёс.

Чын лымшоръёслэн дӥськутсы.

Таӵе дӥськут нуллӥзы Удмурт Элькунэ пырись Алнаш, Грах, Дэри, Пичи Пурга, Можга, Кияса, Кизнер (Бемыж палъёс) ёросъёсысь но Татарстанэ пырись Агрыз, Менделеевск ёросъёсысь удмуртъёс.

Дӥськутэз кылдыто дэрем, азькышет (диал.: айшет), муресазь (диал. кыкрак*), туйлэсь тупатэм ӝужыт нылкышно изьыян (диал.: айшон), йыр шобыртон (диал.: чалма), кымесэ керттон (диал.:йыркерттэт), сюлык, пустоллэсь яке пильыслэсь вурем гужем нуллон выль дӥськут (диал.: дӥсь), саестэм дукес (диал.:саестэм*), зыбын, дукес но шуба (диал.: пась).

Чеберманъёс. Гадь вылазы азвесь коньдонлэсь лэсьтэм чеберманъёс нуллӥзы, чыртыязы уксётӥрлык, чыртывесь ошылӥзы, пельпум вамен – бутьмар*, камали*, сюмысбырттэт*.

Пыдкук. Ветлӥзы кутъёсын; удмурт кутлэн калъёсыз пужыё луо. Юон дыре воштӥськыны кутчало вылэм котӥ, мӧйы кышноос – бигер колоша. Гужем пыдазы дӥсяло вал мертчан шортлэсь, толалтэ – ыж гонлэсь керттэм чуглэс но пыдныр.

Дӥськутсэс лымшор удмуртъёс вурылӥллям кечато яке сюрсо дэралэсь, вӧсяськыны гинэ XIX даурлэн пумаз тӧдьыезлэсь пӧрмыто вылэм.

Паськыт кильымо дэремез пумитаны луэ на Дэри (Завьялово) но Пичи Пурга ёросъёсын улӥсьёс вылысь. Сӧзул но кильымъёс вискытӥ ӝуткаса яке бичаса куэм сюбег дэра вурӟо вал. Сыӵе нимысьтыз куэм дэразы ӧвӧл ке, басма вандэт вурӟылӥллям. Мылазь кыретэз* пырак вандэмын, котырыз пужыё басма вандэтъёсын чебермамын. Ӵапак сое ик «муресазь» шуо. Сюбег сирес ултӥз мыд-мыд палтӥз мылазь кырет борды пунэм калъёс вурӟисько. Гольык гадьзэс ватон понна дэрем улазы ньыль сэрего мурескышет (диал.: кыкрак) нулло. Чын лымшор удмуртъёслэн чалмазы кык пумо вылэм: одӥгъёсызлэн пумъёссы кузесь (40 см), басма вандэтэн яке пӧртэм буёло шортъёсын кильымамын. Мукетъёсызлэн пумъёссы вакчиесь (20-25 см), векчи базар ыж гон яке буртчин шортъёсын тугъямын. Таӵе чалмаос нулло вылэм Дэри ёросын но Пичи Пурга ёросысь куд-ог гуртъёсын улӥсьёс.

Чалмаоссэс 1920-1930-тӥ аръёсы пӧрмытъяны кутскизы басмалэсь, дуръёссэ буртчин яке бурлат шортэн пужыятыса.

Айшонзы лымшор удмуртъёслэн 30-35 см ӝужда луылэм. Сое вылтӥз дэраен кыско вылэм, улзэ бурлатэн бугоръяллям. Дэра вылэ 10-15 копейкаем азвесь коньдон яке пичи узвесь питыриос бырттыло вылэм. Айшонэз выль кенлы эмеспилэн корказ изьыяло, соку ик чалма но йыркерттэт кертто, сюлыкен шобырто.

Выль кен сюлык – кык кесэглэсь ньыль сэрго карыса вурем маке. Пужыезлэн инъетэз – тӧдьы вылтӥ дунне писпу пуктэмын. Музейлэн люкамъёсаз возисько 1030-тӥ арын Нылга (али Ува) ёросысь ваем сыӵе сюлыкъёс. Со выллемъёс 1980-тӥ арын шедьтэмын вал Алнаш ёросысь но Татарстанысь Агрыз ёросысь. Пужыез кизер-курень шортэн пуктэмын, пӧлаз кӧня ке мукет буёлооссэ ватсаса. Кузь тугъёсыз пӧлэстэм нап-горд буртчин шортлэсь пӧрмытэмын.

Йыркерттэт лэсьтӥське сюбег дэра кесэглэсь, азьдорин палыз пужыятэмын яке укоен кыскемын. Куддыръя дуръёссэ векчи азвесь коньдонэн но бирӟыосын чебермаллям. Пумъёсаз дэра яке басма кал вурӟиське. Йыркерттэт кылдытэмын вал, дыр, кымес вылзэс чеберманы, озьы ик пель дорысьтызы но кымес вылысьтызы йырсизэс ватыны.

Чалма, йыркеттэт, айшон но сюлык выль кенлы дӥсяло вал эмеспилэн корказ (выль кен изьыян), выль кен соосыз нуллэ вал быземез бере нылпиез вордскытозь. Нылпиез вордске ке, йырси пунэтсэ но мукет сямен тупатъя, йырсизэ но кышет улэ мукет сямен ватэ, табере со горд сюлык нуллыны кутске. «Выль кенъёс быземзы бере куинь ар пала пелькышет* интые чалма нулло – кус улланёзязы лэзиськись горд дуро тӧдьы дэра. Чалма нуллытозяз выль кен йырсизэ ваё уг пуны на…ныл дыръяз сямен одӥг йырсипунэтэн ветлэ, но со чалма сьӧрысь уг адӟиськы»¹.

«Куинь ар ортчыса, выль кен мунчо эстыса кык-а, куинь-а мӧйы кышноосыз ӧте но йырсизэ дзузьетэ («чузырет». – С.Л.) тупатыса пуныны куре, мукет сямен вераса, калэн ӵош пуныны. Табере со кышномурт луэ но чалма нуллыны уг быгаты ни»². Айшонлэн йылаз туйлэсь яке курлэсь трапеция тусо арбери тупато, сое дэраен кыско но азвесь коньдонъёсын чебермало (Верещагинлэн гожтэмезъя – бырттос*). «Нива» журналын (1887) туспуктэм сётэмын, сое лэсьтӥллям Дэри черкогуртын 1887-тӥ арын 21-тӥ инвожое. Отын воштӥськон дӥськутэн дӥсяськыса удмурт нылкышноос Быдӟым Князез Михаил Николаевичез пумитало. Нылкышноос ӝужыт айшонъёсын, сюлыкъёсын но гадьвесьёсын*. Та суредъя валаськод, XIX даурлэн пумаз но ай промышленной город котырын улӥсь удмуртъёс асьсэ вашкала изьыянъёссэс утьыса возиллям.

Сюлык 1930-тӥ аръёсы кутӥське на выль кенэз эмеспилэн корказ пыртыку шобыртыны гинэ.

Нылкышноос XX даурлэн кутсконаз выль йыркышетэн ветлыны кутско – сьӧд чильпам куинь сэрго кышетэн. Сое нулло огшоры кышет улазы пинал вайыны кутскем дырысенызы нылпи ваемысь дугдытозязы. Та йыркышетэз удмурт кышномуртъёс њуч нылкышноослэсь асэстӥзы, шуыны луоз. Со вӧлмемын вал Сарапул уездын. Нимысьтыз вераны кулэ мӧйы кышномуртлэн йыркышетэз сярысь (диал.: пельшет яке пелькышет*). Чалмалэсь со висъяське куинь люкетлэсь луэменыз (изьыян палыз, бурдъёсыз но пумъёсыз). Пумъёссэ басмалэсь каро, дуръёссэ чильпало яке сюбегак кильымало. Пельшетсэс кышномуртъёс нылпи ваемысь дугдэм беразы нуллыны кутско. Йыразы понэм бере вылтӥз, пумъёссэ гурулазы карыса, кышет кертто. Выл дукессэс (диал.: саестэм) дӥсяло вылэм гужем салкым куазен. Вуремез сыӵе: азьпалыз одӥг вандэтлэсь, гадь кыретэз сӧзул дорозяз пырак вандэмын, тыбырыз куско каремын, урдэсъёсаз кырыж вандэм сеп вуро, озьы дукес сӧзултӥз паськыта, одӥг палаз ӟеп поно на. Вуро дэралэсь, пустоллэсь, пильыслэсь яке сатинлэсь. Сӧзулзэ но суй кыретъёссэ укоен чебермало, сӧзулъёсаз быдэн куинь векчи азвесь коньдон быртто вылэм. Яратыса нуллӥллям пустоллэсь, пильыслэсь но буртчин басмалэсь шымыриё карыса вурем куско выл дӥсьсэс.

Сӥзьыл куазен нылкышноос дӥсяло вылэм урдэглэсь яке гордо-сьӧдо гожмо дэралэсь вурем зыбын*. Толалтэ нуллӥллям басьтэм яке асьсэ куэм урдэглэсь дукес*. Зыбынзэс но, дукессэс но кык пӧртэм тусо пӧръяло вылэм: кустэм, урдэсъёсаз сэп пуктыса, яке куско, тыбырзэ шымыриё карыса.

Удмуртиысь Алнаш, Грах, Можга, Кияса ёросъёсын но Татарстанысь Менделеевск, Агрыз ёросъёсын улӥсь нылкышноослэн гадь чеберманъёссылэн, Дэри но Пичи Пурга ёросъёсын ӵошатыса, туссы но нимзы ласянь ӧжытак пӧртэмез вань.

Ныл дӥськут XIX даурлэн пумаз – XX даурлэн кутсконаз кышномурт дӥськутлэсь туж ик уг висъяськы вылэм. Дэремзылэн азьыз но тыбырыз пельпум ултӥ шымыръяса (кокеткаен) вуремын, саес дуръёсыз пуктыса тупатэмын.

Азькышетсы гадьтэм. Дэремзэс ӵемысь кускерттонэн керттыса азькышеттэк нуллӥллям. Йыразы такъя изьыяло вылэм, но берло сое кышет воштӥз. Кышетсылэсь пумъёссэ нылъёс йырбертӥзы керттылӥзы.

«Нылъёс (ӟучъёс сямен ик) кышет нулло, гурултӥзы керттыса. Тазьы дӥсяськыса, соос номырин но ӟучъёслэсь уг висъясько, уката ик кышет улысьтызы буртчин тасмаен чебермам йырси пунэтсы потэ ке. Юмшан дыръёсы, удмурт тусо но чебергес кариськон понна, нылъёс кышетсэс йырбертӥзы кертто, тыбыр вылазы лэзиськись пумыныз керттэмзэс ватыса. Кышетсэс тазьы кертто ке, гадь вылазы одно ик азвесь коньдонъёсын тупатэм гадьвесьсы луыны кулэ. Чыртызэ нылмурт азвесь коньдонъёсын но весьёсын сузьем чыртывесен чеберма» (Верещагин Г.Е. 47-тӥ бам).

Юон дыръёсы но сюанэ кышет вылтӥзы нылъёс укогут* кертто вал, сое укоен кыскем сюбег дэра вандэтлэсь лэсьто, дуръёсыз туго каремын,туг пӧлы позыр карем пулэсьуко шортэн биньылэм шильыриос бырттылэмын. Гадьвесез котькуд ныллэн аслаз луэ. Узыргес семьяын 5-6 аресэмъёсызлы но сыӵе чеберманъёс лэсьто вал ини. Нылъёслэн та чеберманзы «гурул»* нимаське. Начаргес улӥсь семьяосын азвесь коньдон интые пачкес узвесь питыриос тырылӥзы.

Пиосмуртъёс нулло вал горд буёло векчи кечато дэралэсь вурем дэрем (пиосмурт дэрем), лыз буё сюрсо дэралэсь штани, югытгес но буё дэра куыло вылэм. Толалтэлы штанизэс вуро вал гьыль выртэн куэм урдэглэсь, сьӧд шортсэ сьӧд ыж гонлэсь каро вал.

Пиосмуртъёс йыразы гынлэсь яке дэралэсь вурем шляпа но ыж кулэсь тупатэм изьы* нуллӥзы.

Выл дӥськутсы – дэралэсь, пустоллэсь, урдэглэсь вурем сукман*, дукес но бадӟым дукес; ыж кулэсь вуремез – тулуп*. Бадӟым дукессэс но тулупсэс воргоронъёс дӥсяло вал сӥзьыл но толалтэ кезьыт куазен, кузь сюрес вылэ потыкузы.

Пиосмуртъёс пыдазы кутъёс нуллӥзы. Пусйыны кулэ, XIX даурлэн пумозяз ик ай удмуртъёс кут калъёссэс тӧдьы мертчан но сьӧд ыж гон шортъёслэсь, юн мед луоз шуыса, вал сиен суро пуно вал. Воргоронъёслы бинялтон* нылкышноослэнлэсь кузьгес но паськытгес каро вылэм, толалтэлы урдэглэсь пӧрмыто вал. Юон дыръёсы но гужем ку сапеген ветлӥллям, толалтэ – гын сапеген.

Аспӧртэмлыко луэ вӧсь дӥськутсы. Дэремзы но шортдэремзэ вуро тӧдьы дэралэсь. Азьпалыз одӥг курлэсь вуремын, сӧзыез пырак вандэмын, берыз куско, куасалтӥськись пичи сиресо. Огшоры дыръя пиосмурт куэм ке пунэм сюбег кускерттон нуллэ ке вал, вӧсяськонэ паськыт куэм кускерттон (путо*) керттэ ини. Путоез кышнояськем пиосмурт гинэ нуллыны быгатэ вылэм. Нылмурт, бызьыны дасяськыкуз, вуоно кузпалызлы одно ик путо куылэм. Ужаны дӥсяськукыз, воргорон кусказ кулэсь лэсьтэм паськыт е думылэм, бордаз тӥр поныны конгыри тупатэмын луэ вылэм.

Нош XX даурлэн кутсконаз лымшор удмуртъёслэн дӥсяськоназы трос воштӥськонъёс кылдо: улонысь ышо айшон но сюлык, дэремлэн тусыз воштӥське – муресазь интые дэрем капказь* пуктыны кутско, иське, кыкракез но кулэ каремысь дугдо, дэремлэн шымыриез тросгес луэ, дэремзэс кокеткаен вурыны кутско.

• Лебедева С.Х. Удмурт калык дӥськут = Удмуртская народная одежда. Ижевск, Удмуртия, 2008. – 208 с