Баграш-Бигра

Баграш-Бигра
	Гурт
Баграш-Бигра
Кун	Россия
Историез но географиез
Лыдпусо тодметъёс
Почта интыпусэз	427828

Баграш-Бигра — Удмурт Элькунысь Пичи Пурга ёросысь вашкала удмурт гурт. Огырчи карысен кык иськеме пуксемын. Гуртлы ог 350 арес.

Гурт кылдэм сярысь кӧня ке веранъёс вань. Кин ке шуэ, калык татчы вуиз Кам шур вӧзын сылӥсь Бадӟым Бигра гуртысь, соос пӧлын, пе, вал чебер нылаш Бигра солэн нимыныз ик гуртэз но нимазы. Кин ке вера, соос Татарстанысь вуизы шуыса, нош кин ке — Киров улоспалысь. Йырзы, пе, соослэн вылэм Бураш, нош кышноез вылэм Бигра. Со интыез, кытын нырысетӥ коркаос лэсьтэмын вал, та дыре но нимало Вужгурт. Берлогес Вавож но Нылга палась вуиллям на мукет адямиос, азьветлӥсьсы соослэн вылэм батыр Ядыгар, соин соосты Ядыгар бӧляк шуо вылэм. Бигралан али ке но вань ай Ядгар нимо ульча. Собере кылдэмын на Уллапал (татын улӥллям Алнаш палась вуэм калык). Музъем тырмымтэен, Бигралась потэм калык кошкылиз мукет гуртъёсы (Орлой гурт, Курег гурт, Пуныгурт но мукет).

Баграш-Бигра гуртысь потэмын Камит Усман, кудӥзлэн кивалтэмез улсын эксэй пумит ӝутскылиз котыр гуртысь калык (та веран вылэ пыкиськыса Игнатий Гаврилов гожтэ «Сани» поэмазэ но «Камит Усманов» трагедиязэ).

Баграш-Биграе пӧртэм вакытэ вуылӥзы вылӥ куноос: Венгрилэн президентэз А. Гёнц, Англиысь принц Майкл Кентский, тодмо фин-угор тодосчи Петер Домокош но мукетъёсыз.