Сюрокӧжы

Сюрокӧжы (лат. Lótus corniculátus, ӟуч Лядвенец рогатый) — трос аръёс будӥсь бобыкӧжы семьяысь будос. Туж дуно пудо сиён.

Сюрокӧжы

Вӧлскемез но экологиез

Вӧлскемын Уйпал но Шор Европаын, шундыпуксён но ӵукпал Средиземноморьеын, Иранын, Балкан мукожын но Малой Азиын, Индиын, ваемын Австралие.

Вӧлске кидысэн но вож модосэн. Кидысэз 4-5 ар ӵоже потыны быгатэ. Бусыын туж умой будэ 6-8 °С температураен. Тулыс кизем бере удысъёзыз потыны кутско 10-12 нуналскын, гужем 5-6 нуналскын. Сяськаяськыны кутске 2 толэзьскын, кидысэз вуэ 3 толэзь будэм бере.

Туж умой будэ нюро сюй вылын, ву нюртэмез чида 35-50 нунал. Кӧс куазез но умой чида.

Котькыӵе сюй вылын будэ. Кезьытэз но тӧлъёсыз умой чида. Кизьыны яра вазь тулыс яке сӥзьыл.

Ботанической валэктон

Трос аръёс будӥсь турын, ӝуждалаез 30-40 см, умой утялтыку — 60-80 см. Модосыз вылӥе кыстӥське яке сюй вылын кылле. 3-4 арскын одӥг выжые 180—240 удэт кылдэ.

Выжыез шорсюсюлэмо, озьы ик трос урдэсказ но. Пыре ог 1.5 м мурдалае.

Куаръёсыз черодо, модос куко, куинё.

Сяськалюкез зонтико, вить сяськаё. Сяськаосыз 15 мм-озь.

Емышез трос кидысо кузялэс пуртэс, ог 25 мм, вуэмезъя тэшкаське. Кидысэз пеймыт-лыд, векчи, котырес. 1000 кидыс 1.1-1.4 г. Сяськаяське бер тулысысен бер сӥзьылозь.

Химической составез

Вож будосын 44-72 мг % каротин, 123—130 мг % аскорбиновой кислота. Пеняз 1,170 % кальций но 0,455 % магний.

Уже кутон

Пудоез сюдыны люкало турынзэ, озьы ик кутӥське вож турын, кучы но возьманы яра. Дунъяське узыр углеводъёсын, котькыӵе сюй вылын кема будэменыз. Кӧс турынын белокез 22%-озь.

Кыкетӥ арысеныз умой турын сётыны кутске. 10 арозь будэтыны луэ. Сяськаяськыкуз пудо уг сиы, сяськаосаз курыт буясь тырметъёсыз ваньысь. Скаллэсь йӧлзэ будэтэ.

Мушъёс сяськаосысьтыз трос чечы люкало.