Ува ёрос

Ува ёрос — Удмурт Республикалэн ёросэз, интыяськемын Удмурт шаерлэн шундыпуксён палаз. Герӟаське Якшур-Бӧдья, Дэри, Пичи Пурга, Можга, Вавож, Сюмси но Сьӧлта ёросъёсын. Ёрослэн центрез — Ува каргурт. Интыяськемын 2448,8 квадрат иськем музъем вылын. Улӥсез 40 сюрс 882 адями (2009-тӥ арлы). Удмуртъёс - 44,9 %, ӟучъёс - 50,5 %, бигеръёс - 2,3 %, мукет калыкъёс - 1,9 % (2002-тӥ арын ортчем переписья). Калыклэн лыдызъя Удмуртиысь ёросъёс пӧлын Ува ёрос куинетӥ интыын.

Ува ёрос

Герб Флаг
Центр	Ува каргурт
Улӥсьёс
- ваньмыз	41 100
- плотность	16,8 адями/км²
Территория
- ваньмыз	2445,4 км²

Инкуазь

Ува ёрослэн бадӟым люкетэз интыяськемын Можга вырйыл вылэ. Нылга но Ува шуръёс котырын гинэ Тыловай вырйыл вылэ пыре. Ува ёрос пыр бызё таӵе шуръёс: Валой, какмож, Арлеть, Мушковай. Нюлэсъёс Ува ёрослэсь 60 %-сэ басьто. Отын интыяськемын Областновский заказник — отын быронлэсь утисько койыкъёс, дукъяос, вучайыос, кыр пуныос но мукет пӧйшуръёс. Ува ёрослэн муэз узыр мувӧен, гыбедэн, лэсьтӥськон луоен но горд сюен.

1978-тӥ арын Ува ёросын муын шедьтэмын минерал ву. Ува каргуртын усьтэмын со вуэз поттонъя «Увинская» предприятие. Бӧрысьгес минерал ву потон интыосын усьтэмын «Ува» санаторий.

Ёрослэн кылдэмез

Ува ёрос кылдытэмын Удмурт обласьтлэн исполнительной комитетэзлэн президиумезлэн постановлениезъя 8-тӥ январе 1935-тӥ арын. Та ёросэз кылдытон сярысь решение кутэмын Сьӧлта но Вавож ёросъёслэн укыр пасьтана вӧлмеменызы сэрен. 10-тӥ июле 1935-тӥ арын Ува ёрос центрлы город выллем каргурт (посёлок) ним сётэмын. 1962-тӥ арын Ува ёросэз висъязы кык люкетлы: промышленностья Ува ёрос но гурт удысъя Ува ёрос. Таин валче 1963-тӥ арысен 1965-тӥ арозь Ува ёросэ пыризы Сьӧлта но Вавож ёросъёслэн люкетъёссы. 1965-тӥ арын промышленностьлы но гурт удыслы люкем Ува ёрос нош ик огазеямын вал. Соку кылдӥз огъя Ува ёрос.

Та нуналлы Ува ёросын кун властез быдэсъяло ёрос кенеше пырись депутатъёс - 33 адями, бырйисько 5 арлы. «Ува ёрос» муниципал кылдытэтлэн тӧроез - Владимир Анатольевич Головин. Ува ёрослэн администрациеныз кивалтэ Александр Филиппович Штумф.

Территориослы люкиськон

Ува ёрослэн картаез

Муниципал кылдытэтъёс

Ува ёрос люкиське 17 муниципал кылдытэтъёслы. Ваньзы луо гурт поселениос.

№	Гурт поселение	Центрез	Улон интыосызлэн лыдзы	Улӥсьёсыз (2017)	Площадез, км2
1	Былай гурт поселение	Былай черкогурт	6	985	228,03
2	Ва-Тукля гурт поселение	Ва-Тукля черкогурт	7	1976	149,54
3	Выль Мултан гурт поселение	Выль Мултан черкогурт	6	988	178,65
4	Жужгес гурт поселение	Жужгес гурт	3	562	128,43
5	Каркалай гурт поселение	Каркалай черкогурт	3	1877	30,97
6	Красносельской гурт поселение	Красной черкогурт	5	730	91,70
7	Кулябино гурт поселение	Кулябино гурт	3	440	76,12
8	Кыйлуд гурт поселение	Кыйлуд черкогурт	5	1127	185,44
9	Мушковай гурт поселение	Мушковай черкогурт	5	657	120,84
10	Нылга гурт поселение	Нылга черкогурт	7	2826	179,93
11	Петропавловской гурт поселение	Петровской гурт	6	560	134,91
12	Поршур гурт поселение	Поршур гурт	6	1851	173,44
13	Сям-Можга гурт поселение	Сям-Можга черкогурт	4	647	230,32
14	Ува гурт поселение	Ува посёлок	4	20553	31,12
15	Удугуӵин гурт поселение	Удугуӵин черкогурт	7	1130	264,02
16	Чекан гурт поселение	Чекан черкогурт	7	480	95,11
17	Ӵуштаськем гурт поселение	Ӵуштаськем гурт	5	741	146,82

Гуртъёс

Ува ёросэ пыре 89 улон инты: 1 посёлок, 16 черкогурт, 70 гурт, 1 починка но 1 выселка.

Экономика

Красное черкогурт дорын усьтэмын мувӧй кысконъя Архангельское инты. «Увинское» но «Вишур» огазеяськонъёсын гыбед потто. Ёросын интыяськемын нюлэс поттон 2 комбинат, 1 лесопункт, лэсьтӥськонъя 2 огазеяськон, етӥн поттон но кирпич шуккон огазеяськонъёс. Ува ёросын интыяськемын йӧллэсь, сӥльлэсь сиён-юон поттон. Гурт хозяйствоосын будэто ю нянь, картошка, етӥн, бакча сиёнъёс. Ува каргуртысь вань гуртъёсы сюрес ӝутэмын.

Культура но дышетон

Ёросын усьтэмын 29 школа, со пӧлысь 20-ез шор ёзо тодон-валан сётэ. 34 нылпи сад но пӧртэм профессиослы дышетӥсь колледж. Ужало Искусствоосъя нылпи школа но Нылпи творчествоя центр. Калыкез эмъяло 3 эмъяськон юртъёсын, юрттэт сёто 3 амбулаториын но гуртъёсы интыяськем 40 пала фельдшер-акушер пунктъёсын. Районын ужа культурая 39 юрт, 23 библиотека, 2 школа-интернат но Историяя но чеберлыкъя музей. Ува ёросын вордскемын тодмо писатель Пётр Блинов (1913-1942), Матвей Кельдов (1900-1930), тодмо суредась Геннадий Сидоров но мукетъёсыз. Узей-Тукля гуртын усьтэмын Киужъёсъя юрт. Ёросын потэ "Увинская газета", со вӧлме Ува ёросысь вань гуртъёсы. Тиражез 2 сюрс 282, редакторез. П. В. Люкин.

Чӧлсконъёс

• Ува ёрослэн официальной сайтэз (ӟуч)
• Ува ёрос Кун Кенешлэн сайтаз (ӟуч)
• Ува ёросысь муниципальной образованиос (ӟуч)
• Удмуртиысь ёросъёс (ӟуч)