Урасинова, Ангелина Петровна

Ангелина Петровна Урасинова (нылдыр нимыз Ангелина Петровна Наговицына, вордскемын 15-тӥ куарусёнэ 1938) — удмурт шаертодосчи, гожъяськись, удмурт но бесерман калыкъёслэн культуразылэн популяризаторез, удмурт но бесерман калыкъёслэсь сям-йылолъёссэс утисез.

Ангелина Петровна Урасинова
Вордӥськем нуналыз:	15-тӥ куарусёнэ 1938(1938-09-15) (86 арес)

Вордскемын Удмурт Автономи Элькунысь Балезино ёросысь Турецкой райсоветысь Поторочино гуртын (ХХ даурысь 80-тӥ аръёсы перспектива луисьтэм шуыса ликвидировать каремын). Удмурт. Вамъя воршудысь.

Аиз — Наговицын Пётр Романович, мумиз — Наговицына (ныл дыръяз Максимова) Агния Фёдоровна. Ожлэсь азьло атаез машина-трактор станциын ужамын, анаез кунян возьмась луыса колхозын тыршемын.

Атаез Быдӟым Атыкай ож вакытэ ужан фронтын Мускоын быриз, пинал дырзэ А. П. Урасинова атаезтэк ортчытӥз.

Глазкарысь педагоги дышетсконниез пичи классъёсын дышетӥсь специальностен 1956-тӥ арын йылпумъяз. 1966 -ти арын Глазкарысь педагоги институтэз заочной амалэн быдтӥз.

Дышетэмзэ быдтэмез бере, Балезино ёросысь Юнды черкогуртэ уже лэземын вал. Отын бесерман семьяысь Урасинов Гаен тодматскиз, солы бызиз.

Бесерман семьяын, бесерман черкогуртын улыса, бесерман калыкен, солэн кылыныз, культураеныз тунсыкъяськыны ӧдъяз. Та калыклэн историез, культураез, сям-йылолъёсыз сярысь тодэт люканы кутскиз. Шаертодосэн вырыны ӧдъяз: тупен-тупен шаерлэсь историзэ эскериз, Урасинов семьяысь Миколапи выжылэсь генеалогизэ эскериз, со сяна Юндылэсь историзэ но, Балезино ёрослэн историысьтыз пӧртэм аспектъёсты но сэрттылӥз-пертчылӥз.

Юнды черкогуртысь школаын удмурт кыл но удмурт литератураен дышетӥсьын, покчи классъёсын дышетӥсьын, пионеръёсты нуисьын, класссьӧр (внеклассной) но школасьӧр (внешкольной) ужлэн радъясез луыса, школаысь лыдӟетъюртлэн кивалтӥсез луыса ужаз.

Ансамбыль

А. П. Урасиновалэн кичӧлтэмезъя 6 куартолэзе 1986 аре Юнды черкогуртын фольклор ансамбыль кылдытэмын вал. Та ансамбыль Юндыысь бесерман крезьёсты мытыса улӥз.

9 оштолэзе 1987 аре ансамбыльзы нырысетӥзэ сцена вылэ потӥз — Юндыысь «Мынам гуртэ» ужрадын. 2000-тӥ арын ансамбыль Мускоын фольклор огинъёслэн фестивалязы пыриськиз, Композиторъёслэн корказылэн сцена вылазы крезьёссэс быдэстӥзы.

Ангелина Урасиновалэн тыршемезлы тау карыса, Юндыысь ог 10 бесерман крезь гожтыса утемын вал. Урасиновалы тау карыса дуннелы бесерман крезьёс тодмо луизы.

Музей

А. П. Урасиновалэн кичӧлтэмезъя Юндыын шаертодос музей кылдытэмын. Нырысь со школа музей луыны кулэ вал, нош сэре со быдэс черкогуртлэн музеез луиз. 1990-тӥ арын нимлыко усьтӥськонэз ортчиз. 1992-тӥ арын музеез шаертодос статусэн пусйизы. Ангелина Урасинова музейлы экспонатъёс ас киыныз люкалляз. Та ужын трос юрттӥзы Юндыысь мӧйыос: Урасинов Варсанофий Михайлович, Урасинов Сократ Яковлевич, Биянов Вениамин Терентьевич, Урасинов Николай Максимович, фольклор ансамбыле пыриськисьёс.

Со вакытысен та 2018 арысь шуркынмонозь Урасинова Ангелина музейлэн директорез луыса ужаз.

29 толсуре 2000 аре музейлы Анисия Николаевна Урасиновалэн (Волковалэн) нимыз сётэмын.

Юнды шайвылысь Быдӟым Атыкай оже бырем тодмотэм солдатъёслэсь шайгузэс тупатон мытӥз. Юндыын ужам черкысь вӧсясь но солэн семьяезлэсь шайгузэс тупатон ужъёсты радъяз, Урасинов семьяысь Миколапи выжыысь Урасинов Николайлэсь шайгузэс кичӧлтэмезъя тупатӥзы.

2006 арын Юнды черкогуртлэсь 360 ар тырмемзэ солэн кичӧлтэмезъя пусйизы.